FLASH
Shkruar nga PamfletiFutbollistët e Anglisë marrin një pagesë fikse për çdo ndeshje me kombëtaren, por prej vitesh këtë shumë e dhurojnë për bamirësi. Ndërkohë, shpërblimet për suksesin në Kupën e Botës mund të arrijnë deri në 500 mijë paund për secilin lojtar.
Kombëtarja e Anglisë e nisi me fitore aventurën në Kupën e Botës 2026, duke mposhtur Kroacinë me rezultatin 4-2.
"Tre Luanët" përballen mbrëmjen e së hënës (23 qershor) me Ganën në një ndeshje vendimtare të Grupit L, ku mund të sigurojnë kualifikimin për në fazën e 1/32-ave.
Harry Kane, Jude Bellingham dhe Marcus Rashford ishin mes autorëve të golave në ndeshjen e parë të zhvilluar në Dallas. Anglezët synojnë të përsërisin paraqitjen e mirë edhe në stadiumin e Bostonit, në Massachusetts.
Sa paguhen lojtarët e Anglisë për ndeshjet e Kupës së Botës?
Çdo futbollist përfiton rreth 2.000 deri në 3.000 paund për çdo paraqitje me kombëtaren.
Kjo është tarifa fikse që Federata Angleze e Futbollit (FA) paguan për çdo ndeshje ndërkombëtare, jo vetëm për ato të Kupës së Botës.
Edhe pse kjo shumë mund të duket e konsiderueshme, ajo është shumë më e ulët krahasuar me pagat që marrin yjet e futbollit në klubet e tyre.
Për shembull, Jude Bellingham, i cili aktivizohet te Real Madridi, ka një kontratë që i siguron rreth 17 milionë paund në vit.
Pagesat për ndeshjet me kombëtaren janë më të ulëta, pasi theksi vihet te krenaria për të përfaqësuar vendin dhe jo te përfitimi financiar.
A i dhurojnë lojtarët pagesat për bamirësi?
Që prej vitit 2007, lojtarët e kombëtares angleze kanë një marrëveshje sipas së cilës të gjitha pagesat për paraqitjet me ekipin kombëtar dhurohen për bamirësi përmes England Football Foundation (EFF).
Fondacioni i shpërndan më pas këto fonde për organizata të ndryshme bamirëse.
Që nga nisja e kësaj nisme, janë mbledhur mbi 5 milionë paund për organizata si Cancer Research UK, UNICEF dhe Help for Heroes.
Në drejtimin e fondacionit janë përfshirë edhe figura të njohura të futbollit anglez, si Gareth Southgate, Gary Neville dhe David Beckham.
A marrin shpërblime nëse fitojnë Kupën e Botës?
Nëse Anglia fiton Kupën e Botës 2026, secili lojtar mund të përfitojë mbi 500 mijë paund.
Pas fitores bindëse në ndeshjen e parë, optimizmi te tifozët është rritur ndjeshëm.
Sipas një sondazhi të The Sun Sport, 24,15% e tifozëve besojnë se Anglia do të shpallet kampione e botës këtë vit, krahasuar me vetëm 12% që mendonin kështu para ndeshjes së parë.
Ndryshe nga pagesat për paraqitjet, të cilat prej gati dy dekadash dhurohen për bamirësi, bonuset për ecurinë në Kupën e Botës trajtohen ndryshe.
FIFA i akordon Federatës Angleze shpërblime financiare në varësi të fazës ku arrin kombëtarja. Më pas, FA u shpërndan lojtarëve një përqindje të paracaktuar të kësaj shume.
Edhe pse nuk ekziston një detyrim për t'i dhuruar këto bonuse për bamirësi, kjo nuk do të thotë domosdoshmërisht se e gjithë shuma përfundon në llogaritë bankare të futbollistëve.
Lini një Përgjigje