FLASH
Shkruar nga Pamfleti
Presidenti amerikan Donald Trump deklaroi se SHBA-ja dhe Irani janë shumë pranë arritjes së një marrëveshjeje, ndërsa pjesa më e madhe e negociatave tashmë është përfunduar.
Në një postim në platformën Truth Social, Trump tha se marrëveshja është “negociuar në masë të madhe”, duke nënkuptuar se palët kanë rënë dakord për pjesën kryesore të kushteve dhe se kanë mbetur vetëm aspektet përfundimtare për t’u mbyllur.
“Një marrëveshje është negociuar në masë të madhe, në pritje të finalizimit mes Shteteve të Bashkuara të Amerikës, Republikës Islamike të Iranit dhe vendeve të tjera të përfshira”, shkroi Trump.
Ai shtoi se “detajet dhe aspektet finale të marrëveshjes po diskutohen aktualisht dhe do të shpallen së shpejti”.
Trump bëri të ditur se zhvilloi telefonata me liderët e Arabisë Saudite, Emirateve të Bashkuara Arabe, Katarit, Pakistanit, Turqisë, Egjiptit, Jordanisë dhe Bahreinit lidhur me Iranin dhe një memorandum mirëkuptimi për paqen në rajon.
Sipas presidentit amerikan, një nga elementët kryesorë të marrëveshjes do të jetë rihapja e Ngushticës së Hormuzit.
“Përveç shumë elementëve të tjerë të marrëveshjes, Ngushtica e Hormuzit do të hapet”, deklaroi ai.
Trump konfirmoi gjithashtu se ka zhvilluar një bisedë telefonike edhe me kryeministrin izraelit Benjamin Netanyahu.
“Telefonata me Bibi Netanyahun shkoi shumë mirë”, shkroi presidenti amerikan.
Deklaratat e Trump vijnë në një moment kur negociatat mes SHBA-së dhe Iranit duket se po afrohen drejt një marrëveshjeje më të gjerë për programin bërthamor iranian dhe uljen e tensioneve në Lindjen e Mesme.
Postimi i plotë i Trump:
Jam në Zyrën Ovale në Shtëpinë e Bardhë, ku sapo zhvilluam një telefonatë shumë të mirë me Princin Mohammed bin Salman të Arabisë Saudite, Mohammed bin Zayed Al Nahyan të Emirateve të Bashkuara Arabe, Emirin Tamim bin Hamad Al Thani të Katarit, kryeministrin Mohammed bin Abdulrahman Al Thani dhe ministrin Ali al-Thawadi të Katarit, Field Marshal Syed Asim Munir të Pakistanit, presidentin Recep Tayyip Erdoğan të Turqisë, presidentin Abdel Fattah el-Sisi të Egjiptit, Mbretin Abdullah II të Jordanisë dhe Mbretin Hamad bin Isa Al Khalifa të Bahreinit, lidhur me Republikën Islamike të Iranit dhe të gjitha çështjet që lidhen me një Memorandum Mirëkuptimi për PAQEN.
Një marrëveshje është negociuar në masë të madhe, në pritje të finalizimit mes Shteteve të Bashkuara të Amerikës, Republikës Islamike të Iranit dhe vendeve të tjera të përmendura.
Veçmas, pata një telefonatë me kryeministrin Bibi Netanyahu të Izraelit, e cila gjithashtu shkoi shumë mirë.
Aspektet dhe detajet përfundimtare të marrëveshjes po diskutohen aktualisht dhe do të shpallen së shpejti.
Përveç shumë elementëve të tjerë të marrëveshjes, Ngushtica e Hormuzit do të hapet.
Faleminderit për vëmendjen ndaj kësaj çështjeje!
Presidenti DONALD J. TRUMP
He se javen tjeter e dredh e do thote, do i bej hi fare.