FLASH
Shkruar nga Pamfleti
Gjatë një fjalimi në Pentagon, Sekretari i Mbrojtjes i SHBA-së, Pete Hegseth, citoi një pasazh biblik në një formë që përputhet me versionin e përdorur në filmin “Pulp Fiction” të regjisorit Quentin Tarantino.
Videoja e momentit u përhap me shpejtësi në rrjetet sociale, duke tërhequr vëmendje për referencën e pazakontë në një kontekst zyrtar.
Teksti origjinal nga Libri i Profetit Ezekiel në Dhiatën e Vjetër (25:17) thotë: “Do të ushtroj hakmarrje të madhe mbi ta dhe do t’i ndëshkoj me zemërim; dhe do të dinë se unë jam Zoti, kur të kryej hakmarrjen time mbi ta”.
Në filmin e Tarantinos, personazhi Jules Winnfield, i interpretuar nga Samuel L. Jackson, reciton një version të zgjeruar dhe të ndryshuar të këtij pasazhi përpara një akti dhune. Ky version nuk përkon me tekstin biblik dhe është krijim artistik i skenarit.
Hegseth përdori pikërisht këtë variant të njohur nga filmi, duke përfshirë fraza si “rruga e të drejtëve është e vështirë” dhe referenca për drejtimin e të dobëtëve “nëpër luginën e errësirës”.
“Rruga e të drejtëve është e vështirë, sepse pengohet nga njerëz të ligj egoistë dhe tiranë. I bekuar është bariu që, në emër të mëshirës dhe vullnetit të mirë, i udhëheq të dobëtit nëpër luginën e errësirës, sepse është ai që kujdeset për vëllezërit e tij dhe i kthen bijtë që kanë humbur rrugën. Dhe unë do të ekzekutoj hakmarrje të madhe mbi ta me ndëshkime të tërbuara, mbi ata që kanë komplotuar për të dëmtuar dhe helmuar vëllezërit e mi. Dhe ju do ta dini se emri im është Zot, kur hakmarrja ime të bjerë mbi ju”, tha ai.
Lini një Përgjigje