FLASH
Shkruar nga Pamfleti
Sekretari amerikan i Mbrojtjes, Pete Hegseth, së bashku me Shefin e Shtabit të Përgjithshëm, gjeneralin Dan Caine, zhvilluan një konferencë për shtyp mbi zhvillimet në përballjen SHBA–Izrael me Iranin.
Kjo ishte deklarata e parë publike nga drejtues të lartë ushtarakë që nga nisja e bllokadës ndaj porteve iraniane. Sipas Hegseth, SHBA i bën thirrje regjimit iranian të marrë një “vendim të mençur”, duke paralajmëruar se në rast mosrespektimi të marrëveshjeve, bombardimet do të rifillojnë menjëherë.
Ministri i Mbrojtjes konfirmoi se Uashingtoni do ta mbajë në fuqi bllokadën detare ndaj porteve iraniane, e cila ka hyrë në fuqi që nga e hëna, “për aq kohë sa të jetë e nevojshme”.
Gjenerali Dan Caine sqaroi se masa zbatohet për të gjitha anijet, pavarësisht kombësisë, që lëvizin drejt ose nga portet iraniane. Ai theksoi se operacioni përbën një bllokadë të porteve dhe jo të Ngushticës së Hormuzit.
Në deklaratat e tij, Hegseth shtoi se SHBA do të mirëpriste pjesëmarrjen e vendeve të tjera për të kontribuar në operacionet që lidhen me sigurinë në Ngushticën e Hormuzit.
Sipas Hegseth, ekzistojnë vlerësime se Mojtaba Khamenei, i përshkruar si figurë kyçe në udhëheqjen iraniane, është plagosur, por mbetet gjallë. Kjo deklaratë nuk u shoqërua me prova të pavarura.
Gjithashtu, sekretari amerikan deklaroi se Kina i ka garantuar SHBA-së se nuk do të furnizojë Iranin me armë gjatë periudhës së armëpushimit.
Lini një Përgjigje