FLASH
Shkruar nga Pamfleti
Presidenti i SHBA-së, Donald Trump, deklaroi të shtunën se po bashkëpunon me Guvernatorin e Luizianës, Jeff Landry, të cilin e ka caktuar si të dërguar të posaçëm për Groenlandën, për të nisur një spital lundrues drejt ishullit arktik.
Trump ka përsëritur në disa raste synimin për të marrë kontrollin e Groenlandës, territor autonom nën sovranitetin e Mbretërisë së Danimarkës.
Ai e bëri publik planin përmes një postimi në platformën Truth Social, pak para një darke me guvernatorë republikanë në Shtëpinë e Bardhë. Gjatë aktivitetit, Trump u ul pranë Landry-t dhe zhvilloi një bisedë të gjatë me të.
“Në partneritet me Guvernatorin fantastik të Luizianës, Jeff Landry, ne do të dërgojmë një spital lundrues në Groenlandë për t’u kujdesur për shumë njerëz që janë të sëmurë dhe nuk marrin kujdes atje. Është duke ardhur!!!”, shkroi Trump.
As Shtëpia e Bardhë dhe as zyra e Landry-t nuk dhanë sqarime lidhur me postimin. Ata nuk specifikuan nëse autoritetet daneze apo ato të Groenlandës kishin kërkuar anijen spitalore, si dhe nuk identifikuan kategoritë e pacientëve që do të përfitonin nga kjo ndihmë.
Reagimi i Trump erdhi disa orë pasi Komanda Daneze e Arktikut njoftoi për një operacion evakuimi mjekësor pranë brigjeve të Nuuk. Një nëndetëse amerikane ndodhej rreth shtatë milje detare larg kryeqytetit të Groenlandës kur një anëtar i ekuipazhit kërkoi ndihmë urgjente. Autoritetet daneze transportuan personin me helikopter SeaHawk drejt një spitali në Nuuk, sipas një deklarate të Ministrisë Daneze të Mbrojtjes.
Lini një Përgjigje