FLASH
Shkruar nga Pamfleti
Presidenti serb Aleksandar Vuçiç ka marrë në mbrojtje dhunuesit e studentëve, disa orë pas incidenteve që u regjistruan në Novi Sad, atje ku u festua 200-vjetori i Matica Srpska. Studentët u sulmuan pranë Teatrit Kombëtar Serb nga një grup personash të lidhur me SNS-në, në prani të forcave policore, që nuk ndërhynë për të shmangur përplasjen.
Madje, studentët u thanë gazetarëve se kur filloi përplasja, policia mendoi se ata ishin një problem më i madh sesa "një grupi i SNS-së " që dhunuan, kërcënuan dhe fyen studentët.
Në një konferencë për shtyp para ndërtesës së Rektoratit të Universitetit të Novi Sadit , një nga studentët me një lëndim në kokë, tha se u godit vetëm sepse ndërhyri kur një vajzë u kërcënua nga një grup burrash.
"Femrat u kërcënuan, iu tha se meritonin të përdhunoheshin. Banditë të SNS na sulmuan. U përpoqa të mbroja një studente që u sulmua, kur banditi më goditi në kokë”, tha një nga studentët.
Ai pretendon se policia nuk reagoi gjatë gjithë kohës kur studentët u sulmuan nga banditët.
Një nga studentet e sulmuara tha se një burrë e goditi me grusht në fytyrë, e rrëzoi përtokë dhe filloi ta godiste me shqelma.
Një studente foli gjithashtu për ngjarjet përpara festimit të 200-vjetorit të Matica Srpska, duke theksuar se anëtarët e SNS-së e mbështetën pas murit dhe u godit nga të paktën tre burra.
Por të gjitha denoncimet e studentëve janë rrëzuar nga një reagim i Presidentit serb Aleksandar Vuçiç. Ai madje e konsideroi si të neveritshme sjelljen e studentëve, duke i akuzuar ato se po sulmojnë "themelet e shtetit serb dhe kishës".
“Fjala ‘më fal’ është një fjalë fisnike dhe është gjithmonë mirë kur dikush kërkon falje”, tha Aleksandar Vuçiç në një intervistë për TV Pink.
“Mbrëmë, njerëzit panë se në asnjë festë serbe, që nga Vidovdani e deri më sot, nuk ka pasur sulme të drejtpërdrejta mbi themelet e shtetit serb, kishën serbe dhe, më e rëndësishmja, ata sulmojnë të gjitha vlerat serbe, traditën dhe kulturën tonë, gjithçka që është e rëndësishme për një serb”, tha Vuçiç.
Ai vlerësoi se Matica Srpska gjithmonë i ka mbrojtur njerëzit dhe është përpjekur për bashkim, por "dikush u përpoq ta pengonte këtë ngjarje".
“Ky nuk është një sulm ndaj Vuçiçit apo një sulm ndaj institucioneve shtetërore. Ky është një sulm ndaj shtetit tonë, kishës dhe shoqërisë sonë dhe të gjitha vlerave, jetës sonë. Një sulm i pakuptimtë, i tmerrshëm, që nuk mund ta kuptoni se si është e mundur që disa njerëz nuk e kuptojnë dhe nuk e shohin”, tha presidenti serb.
Lini një Përgjigje