FLASH
Shkruar nga Pamfleti
Shtetet e Bashkuara vendosin kufizime detare, ndërsa disa shtete dhe organizata kërkojnë de-eskalim dhe respektim të lirisë së navigimit...
Bllokada detare e shpallur nga presidenti amerikan Donald Trump në zonën e Ngushticës së Hormuzit ka hyrë në fuqi, pasi ka kaluar afati i përcaktuar për zbatimin e saj në orën 16:00 sipas kohës shqiptare.
Megjithëse forcat e armatosura amerikane nuk kanë konfirmuar zyrtarisht fillimin e operacionit, Komanda Qendrore e SHBA (Centcom) kishte njoftuar më herët se masa do të zbatohej në këtë orar, në përputhje me vendimin presidencial.
Sipas Centcom, bllokada do të zbatohet në mënyrë të paanshme ndaj të gjitha anijeve që hyjnë ose dalin nga portet dhe zonat bregdetare iraniane, përfshirë portet në Gjirin Arabik dhe në Gjirin e Omanit. Autoritetet amerikane synojnë të kufizojnë aksesin detar drejt infrastrukturave portuale dhe energjetike të Iranit.
Agjencia britanike për sigurinë detare, Ukmto, konfirmon se kufizimet përfshijnë të gjithë vijën bregdetare iraniane, duke nisur nga Gjiri Arabik deri në Detin Arabik në lindje të Ngushticës së Hormuzit. Në një njoftim zyrtar, agjencia thekson se tranziti përmes ngushticës drejt destinacioneve jo-iraniane nuk do të pengohet, por paralajmëron për një prani të shtuar ushtarake në zonë. Anijeve neutrale që ndodhen aktualisht në portet iraniane u është dhënë një afat i kufizuar për t’u larguar.
Pas nisjes së bllokadës, reagoi ashpër dhe presidenti amerikan Donald Trump, i cili kërcënoi se do të sulmohet çdo anije që i afrohet bllokadës.
“Marina e Iranit ndodhet në fund të detit, plotësisht e shkatërruar – 158 anije. Ajo që nuk kemi goditur janë disa nga anijet e tyre të vogla, ato që quajnë ‘anije sulmi të shpejtë’, sepse nuk i kemi konsideruar si kërcënim të madh. Paralajmërim: nëse ndonjë nga këto anije afrohet diku pranë BLLLOKADËS sonë, ato do të eliminohen menjëherë, duke përdorur të njëjtin sistem eliminimi që përdorim kundër trafikantëve të drogës në det. Është i shpejtë dhe brutal. P.S. 98.2% e drogës që hyn në SHBA përmes oqeanit ose detit është NDALUAR! Faleminderit për vëmendjen ndaj kësaj çështjeje”, shkruan ai.
Vendimi amerikan ka nxitur reagime të menjëhershme nga aktorët ndërkombëtarë. Katari ka bërë thirrje për të mos përdorur rrugët detare si mjet presioni apo negociimi. Në një bisedë telefonike me ministrin e Jashtëm iranian Abbas Araghchi, kryediplomati i Katarit Mohammed bin Abdulrahman Al Thani ka kërkuar ruajtjen e hapur të rrugëve detare dhe garantimin e lirisë së navigimit, duke i bërë thirrje të gjitha palëve të mbështesin përpjekjet për ndërmjetësim.
Edhe Kina ka shprehur shqetësim për zhvillimet. Ministri i Jashtëm Ëang Yi deklaron se bllokada e Ngushticës së Hormuzit nuk është në interesin e komunitetit ndërkombëtar dhe se zgjidhja e krizës duhet të arrihet përmes mjeteve politike dhe diplomatike. Ai nënvizon se Pekini mbështet sigurinë dhe sovranitetin e vendeve të Gjirit, ndërsa kërkon një rol më aktiv në uljen e tensioneve.
Nga ana tjetër, Organizata Ndërkombëtare Detare e OKB-së thekson se, sipas të drejtës ndërkombëtare, asnjë shtet nuk ka të drejtë të kufizojë kalimin e lirë në ngushticat ndërkombëtare që përdoren për tranzit global. Sekretari i përgjithshëm Arsenio Dominguez rikujton rëndësinë e respektimit të lirisë së navigimit, duke iu referuar drejtpërdrejt situatës në Ngushticën e Hormuzit, një nyje strategjike për transportin e naftës në nivel global.
Zhvillimet në këtë zonë rrisin tensionet në Lindjen e Mesme dhe shtojnë pasigurinë në tregjet ndërkombëtare të energjisë, ndërsa komuniteti ndërkombëtar vazhdon të kërkojë rrugë për de-eskalim dhe dialog. /Pamfleti
Lini një Përgjigje