FLASH
Shkruar nga Pamfleti
Pakistani ka shprehur gatishmërinë për të pritur bisedime të mundshme mes Iranit dhe Shteteve të Bashkuara, në një kohë kur tensionet mes dy vendeve mbeten të larta dhe deklaratat zyrtare vijojnë të jenë kontradiktore.
Zëdhënësi i Ministrisë së Jashtme pakistaneze, Tahir Hussain Andrabi, deklaroi se Islamabadi është i hapur për të organizuar një tryezë dialogu, nëse të dyja palët bien dakord.
“Pakistani është gjithmonë i gatshëm të presë bisedime”, tha ai për CNN.
Kjo ofertë vjen vetëm disa orë pasi Irani hodhi poshtë pretendimet për hapjen e një kanali diplomatik me SHBA-në gjatë fundjavës së kaluar. Ministria e Jashtme iraniane theksoi se nuk ka pasur “asnjë dialog” me Uashingtonin, sipas mediave shtetërore.
Në anën tjetër, presidenti amerikan Donald Trump deklaroi se bisedimet mes dy vendeve kanë ndodhur dhe madje kanë prodhuar një marrëveshje me 15 pika, duke thelluar më tej paqartësitë rreth situatës.
Ndërkohë, burime diplomatike bëjnë me dije se komunikimi mes Teheranit dhe Uashingtonit ka vijuar kryesisht në mënyrë indirekte, përmes vendeve të treta si Turqia dhe Egjipti, në përpjekje për të ulur tensionet në rajon.
Zhvillimet vijnë në një moment kritik, teksa sulmet amerikano-izraelite ndaj Iranit kanë hyrë në javën e katërt, duke shtuar nevojën për një zgjidhje diplomatike dhe shmangien e përshkallëzimit të mëtejshëm.
Lini një Përgjigje