FLASH
Shkruar nga Pamfleti
SHBA dhe Irani arrijnë draft-marrëveshje 60-ditore për armëpushim dhe bisedime bërthamor
Shtetet e Bashkuara dhe Irani kanë arritur një marrëveshje paraprake për një memorandum mirëkuptimi 60-ditor, me qëllim zgjatjen e armëpushimit dhe nisjen e negociatave për programin bërthamor të Teheranit.
Megjithatë, presidenti amerikan Donald Trump nuk ka dhënë ende miratimin përfundimtar, raportoi Axios duke cituar dy zyrtarë amerikanë dhe një burim rajonal të përfshirë në ndërmjetësim.
Sipas medias amerikane, nënshkrimi i memorandumit do të përbënte zhvillimin më të rëndësishëm diplomatik që nga fillimi i konfliktit. Megjithatë, një marrëveshje përfundimtare që do të përmbushte kërkesat e administratës Trump për çështjen bërthamore do të kërkonte negociata të mëtejshme intensive.
Zyrtarë amerikanë thanë se shumica e kushteve të marrëveshjes ishin dakordësuar deri të martën, por të dyja palët prisnin ende miratimin nga nivelet më të larta politike.
Sipas Axios, pala iraniane më vonë informoi ndërmjetësuesit se kishte siguruar autorizimet e nevojshme dhe ishte gati për nënshkrim, megjithëse Teherani nuk e ka konfirmuar publikisht këtë informacion.
Negociatorët amerikanë i paraqitën Trumpit detajet e marrëveshjes, por ai nuk dha menjëherë pëlqimin e tij. “Presidenti u tha ndërmjetësuesve se dëshiron disa ditë për ta shqyrtuar”, deklaroi një zyrtar amerikan.
Axios vëren se Trump dhe këshilltarët e tij kanë besuar edhe më herët gjatë konfliktit se një marrëveshje ishte pranë finalizimit, por përpjekjet e mëparshme nuk u konkretizuan.
Memorandumi parashikon gjithashtu që lundrimi në Ngushticën e Hormuzit të zhvillohet “pa kufizime”. Sipas zyrtarëve amerikanë, kjo nënkupton mungesë tarifash dhe ndërhyrjesh ndaj anijeve tregtare, ndërsa Irani do të duhet të largojë të gjitha minat detare nga ngushtica brenda 30 ditëve.
Po ashtu, bllokada detare amerikane pritet të hiqet paralelisht me rifillimin e transportit tregtar detar.
Dokumenti do të përfshijë edhe angazhimin e Iranit për të mos ndjekur zhvillimin e armëve bërthamore. Çështjet e para që do të diskutohen gjatë periudhës 60-ditore lidhen me menaxhimin e uraniumit të pasuruar të Iranit dhe të ardhmen e programit iranian të pasurimit.
Nga ana tjetër, SHBA do të angazhohet të diskutojë lehtësimin e sanksioneve dhe zhbllokimin e fondeve iraniane të ngrira, si pjesë e negociatave. Memorandumi përfshin gjithashtu diskutime mbi një mekanizëm që do ta ndihmonte Iranin të rifillonte marrjen e mallrave dhe ndihmës humanitare.
Lini një Përgjigje