FLASH
Shkruar nga Pamfleti
Kryeministri Edi Rama e prezantoi si "modelin e të riut që sjell rezultate nga komunitete të vështira". Por Andis Salla, i emëruar Ministër i Bujqësisë në shtator 2025, nuk vjen me ekspertizë bujqësore, por me CV-në e një avokati penal dhe ish-drejtori burgu. Vjen gjithashtu me firmën mbi një kontratë të dyshimtë mbetjesh në Cërrik, dhe me një ndërtesë 361 m² të deklaruar si "dhurim" pa dhurues. Ndërkohë, në tryezën e tij të re e pret dosja më e rëndë financiare e Shqipërisë postkomuniste: 146 milionë euro të bllokuara nga Brukseli dhe 52 raste mashtrimi të dokumentuara nga OLAF.
Pasi kaloi gjashtë vite si kryetar i Bashkisë së Cërrikut, një prej bashkive më të varfra të vendit, kryeministri Edi Rama e ka sjellë Andis Sallën në kupolën e qeverisë, duke i besuar dikasterin e Bujqësisë pikërisht në momentin kur SPAK po heton agjencinë që ai tani drejton. Ky është profili i një emërimi që sfidon çdo logjikë meritokratike, por që i shërben një qëllimi të vetëm: ndërrimi i fytyrës pa ndërruar sistemin.
NGA AVOKAT BURGU NË MINISTËR BUJQËSIE, ME NDALESË NË CËRRIK
Andis Salla nuk ka asnjë lidhje profesionale me bujqësinë apo zhvillimin rural. Ka studiuar drejtësi penale, ka punuar si avokat dhe ka drejtuar Institucionin e Ekzekutimit të Vendimeve Penale në Elbasan. Emërimet e tij kanë ardhur gjithmonë nga strukturat e Partisë Socialiste në Elbasan, jo nga ndonjë garë meritokratike.
Në gusht 2019, Salla u zgjodh kryetar i Bashkisë Cërrik. Gjatë gjashtë viteve në këtë post, firma e tij qëndron mbi një vendim që sot hetohet nga Prokuroria e Elbasanit për shpërdorim detyre dhe korrupsion pasiv.
Bëhet fjalë për amendimin e kontratës me shoqërinë "ECO-ELB", kompania që administron shërbimin e mbetjeve në Qarkun e Elbasanit dhe që lidhet me drejtorin Leli Kaja. Në maj 2025, së bashku me shtatë kryetarë të tjerë bashkish të qarkut, Salla firmosi ndryshimin e kontratës: bashkitë hoqën detyrimin e "ECO-ELB" për shërbimin e incenerimit, por njëkohësisht rritën çmimin e pagesës.
Ironia? Inceneratori i Elbasanit nuk ka funksionuar prej vitesh. Megjithatë, bashkitë kanë vazhduar të paguajnë miliona lekë për djegien e mbeturinave si të ekzistonte. Vetëm Bashkia Elbasan i ka paguar "ECO-ELB" mbi 1.7 miliardë lekë të vjetra në dy vitet e fundit. Bashkia Cërrik e Sallës ishte ndër nënshkrueset e kësaj kontrate. Prokuroria e Elbasanit ka thelluar hetimet, duke marrë në shënjestër drejtorët juridikë, shefat e financës dhe zyrtarët e kompanisë.
PASURIA E ERRËT: NDËRTESA 361 M² DHE "DHURIMI" PA DHURUES
Pamfleti ka analizuar deklaratat zyrtare të pasurisë të Andis Sallës pranë ILDKPKI për periudhën 2019-2024. Ajo që del është një skemë klasike e pasurimit të pashpjegueshëm.
Në vitin 2019, kur nisi mandatin si kryetar bashkie, Salla deklaroi zero pasuri të paluajtshme. Të ardhura nga paga: 386,454 lekë për pesë muaj. Gjendje bankare: 344,424 lekë.
Në vitin 2023, ndodh kërcimi. Salla deklaron për herë të parë një pasuri të paluajtshme: një ndërtesë prej 361 metër katrorë, me vlerë 8,987,095 lekë (rreth 88,000 euro). Si burim krijimi, ai shënon një fjalë të vetme: "Dhurim".
Kush është dhuruesi? Deklarata nuk e thotë. A ekziston akti noterial i dhurimit? Nuk dihet. Çfarë është ky objekt dhe ku ndodhet saktësisht? Publiku nuk e ka mësuar ende.
Në të njëjtin vit, Salla rrit gjendjen bankare me 2,148,760 lekë shtesë. Në vitin 2024, llogaritë e tij shtohen edhe me 2,871,794 lekë të tjera, me burim të deklaruar "të ardhura nga paga". Por paga vjetore si kryetar bashkie ishte rreth 1.7 milionë lekë bruto. Matematika nuk përputhet.
TRASHËGIMIA E MINISTRISË: 146 MILIONË EURO TË BLLOKUARA DHE SPAK NË DERË
Kur Salla u betua si ministër në shtator 2025, ai trashëgoi jo një dikaster normal, por epiqendrën e skandalit më të madh financiar që Shqipëria ka pasur ndonjëherë me Bashkimin Europian.
Fondet IPARD II dhe III janë të bllokuara që nga korriku 2023, pasi OLAF dokumentoi 52 raste mashtrimi dhe kërkoi 35 milionë euro mbrapsht. Skema ishte sistematike: aplikantët detyroheshin të paguanin kompani konsulence të paracaktuara; grantet shkonin tek persona me lidhje politike; në një rast, një grant për fermë përfundoi si vilë në Dhërmi.
AZHBR, agjencia që administron këto fonde, është nën varësinë direkte të ministrit. SPAK po heton mbi bazën e materialeve të OLAF. Në mars 2026, ish-ministrja Frida Krifca u mor në pyetje nga kreu i SPAK. Në prill 2026, biznesmenit Reni Ashiku, administrator i "Converse Management Consulting", iu komunikua akuza.
Salla ndodhet në një pozitë të paprecedentë: ai drejton ministrinë dhe agjencinë që janë objekt i një hetimi penal aktiv. Konflikti institucional është flagrant.
GËNJESHTRAT NDAJ PARLAMENTIT DHE HESHTJA E BRUKSELIT
Në shkurt 2026, nga foltorja e Kuvendit, Salla deklaroi me siguri: "Ne brenda 6-mujorit të parë do të kemi IPARD III. 146 milionë euro do të jenë në dispozicion të fermerëve."
Komisioni Europian nuk ka lëshuar asnjë komunikatë që konfirmon këtë afat. Përkundrazi, zëdhënësi i KE-së për bujqësinë ka sqaruar se ndërprerja e pagesave mbetet në fuqi deri në njoftim tjetër zyrtar dhe se nuk ka asnjë datë të caktuar. Pas vizitës së Sallës në Bruksel më 9 mars 2026, nuk doli asnjë deklaratë zyrtare nga pala europiane.
Kjo është një praktikë e njohur e qeverisë: shpallja e afateve optimiste pa asnjë dokument zyrtar europian prapa tyre. Salla e ka përvetësuar këtë model me përpikëri. Ai gënjen parlamentin shqiptar duke i shitur fermerëve shpresa të rreme për fonde që Brukseli nuk ka ndërmend t'i çelë pa përfunduar hetimet e SPAK dhe pa u përmbushur masat korrigjuese.
PYETJET QË MINISTRI SALLA DUHET T'U PËRGJIGJET PUBLIKISHT
1. Mbi IPARD-in: Cili dokument zyrtar i Komisionit Europian konfirmon se fondet do të çelen "brenda 6-mujorit të parë"? Nëse një dokument i tillë nuk ekziston, pse e gënjeu Kuvendin?
2. Mbi konfliktin e interesit: Si mund të garantojë ai pavarësinë e hetimeve të SPAK mbi AZHBR-në, kur vetë ai është eprori direkt i agjencisë nën hetim?
3. Mbi kontratën ECO-ELB: Sa ka paguar Bashkia Cërrik për incenerimin e mbeturinave gjatë periudhës kur inceneratori nuk funksiononte? Çfarë shërbimi konkret u ofrua?
4. Mbi ndërtesën 361 m²: Kush e dhuroi këtë pronë me vlerë 8.9 milionë lekë? Ku ndodhet ajo saktësisht? A ekziston akti noterial i dhurimit dhe pse nuk është bërë publik emri i dhuruesit?... (vijon) /Pamfleti
Tani u kujtuat per fshataret e maloket t'i tregoni emrin, se vendin nuk ua tregoni dot? Eshte shume vone. Merruani ketyre parate te rrisni standardin e jeteses e jo na beni show me "Shoqata Diasporash". Diaspora eshte kerrusur nga puna e rende per te mbijetuar dhe sic ka qene e percare ne kohen e qenit nga "biografia" u perca shume me keq, nga "pluralizmi", lufta e klasave te vjetra e te reja, feja, krahinat, grykesia, imoraliteti, ligji 7501. Nuk pame nje Shqiptar te Shqiperise e te Kosoves ta ndihmojne njeri tjetrin, sepse jane keto qe thashe me siper mes nesh. Mer e bukura eshte kur degjojme halete e Parlamentit kur perbuzin ndonje koleg apo kundershtar e thone, ai ka qene emigrant, sikur te jete nje cope mut. Pervec tokes e varreve nuk i bie ne mend askujt per ata qe shkaterruan kombin e po e cojne drejt zhdukjes.