FLASH
Shkruar nga PamfletiKy është Blloku i lajmeve nga kronika e zezë deri në këtë orë të ditës, ku ndër të tjera veçojmë:
Altin Ndoci, i arrestuar me urdhër të SPAK, ka grushtuar një polic dhe është arratisur nga spitali ku po kurohej. Administrata e burgjeve ka reaguar duke konfirmuar largimin e tij dhe po vijon kërkimi intensiv për kapjen e të arratisurit.
Në fushën e drejtësisë, GJKKO ka vendosur kalimin për gjykim të dosjes ndaj dy të pandehurve Amar Shkëmbi dhe Bledar Polovina, të lidhur me atentatin ndaj ish-prokurorit Arjan Ndoja. Në ngjarjen e 1 nëntorit 2019, si pasojë e të shtënave humbi shoferi i Ndojës, Andi Maloku, ndërsa prokuroria dhe SPAK vijojnë hetimet ndaj pjesëmarrësve të tjerë të grupit të strukturuar kriminal.
Në Durrës, pas përmbytjeve të fundit, prokuroria ka sekuestruar dokumentet për hidrovorin e ri, pjesë e një projekti 19 milionë euro, për të hetuar nëse mosfunksionimi i tij ka rënduar situatën. Hetimi vjen pas raportimeve se përmbytjet kanë shkaktuar edhe humbjen e jetës së punonjësit A.H., i kapur nga rrjedha e ujit.
Babë e bir, Ylli dhe Altin Meçe, kanë rrëfyer tmerrin që përjetuan në Vlosë të Cakranit, ku u dhunuan nga një polic dhe shokët e tij, duke bërë apel për ndërhyrje të menjëhershme shtetërore për mbrojtjen e jetës së tyre.
Ndërkohë, seanca ndaj Franc Çopjas dhe të pandehurve të tjerë në Bruksel, përfshirë krimet e klanit mafioz shqiptar, është ndërprerë nga incidenti me buburrecat dhe pritet me interes ndërkombëtar.
Në Itali, një shqiptar është arrestuar në Rimini për posedim dhe trafik droge, ndërsa një tjetër, Kristian Caka, u kap me pistoletë “Glock”, bizhuteri dhe orë luksoze, pas një ndjekjeje me karabinierët në zonën e Romës. Hetimet tregojnë se arma ishte vjedhur më parë, ndërsa bashkëpunëtori i tij mbetet në kërkim.
Nga aksidentet rrugore, një incident i shumëfishtë në Vlorë ka përfshirë gjashtë automjete të përplasura nga një i ri, duke shkaktuar dëme të shumta materiale dhe bllokim të qarkullimit, por fatmirësisht pa të lënduar. Ndërsa në Deçan, tre persona u plagosën nga të shtëna me armë zjarri në një lokal; autori ishte në gjendje të dehur dhe ngjarjen e konfirmoi edhe një zyrtar policie.
Ngjarje ndërkombëtare: një zyrtar i lartë rus u gjet i pajetë brenda ambasadës në Qipro; shënimi i fundit i tij mbahet sekret nga Moska. Po ashtu, Irani ka paralajmëruar ekzekutimin me varje të 26-vjeçarit Erfan Soltani, arrestuar gjatë protestave antiqeveritare, me ekzekutimin e planifikuar më 14 janar.
Lini një Përgjigje