FLASH
Shkruar nga Pamfleti
Në GJKKO pritet të zhvillohet sot seanca paraprake lidhur me të ashtëquajtën dosjen “Veliaj” ku të pandehur janë Kryebashkiaku i Tiranës, bashkëshortja e tij dhe 28 persona e shoqëri.
Në këtë seancë paraprake, pritet që GJKKO të përcaktojë nëse dosja e paraqitur nga SPAK duhet ose jo të kalojë për gjykim.
Në seancën e kaluar, e cila u shty me kërkesë të avokatëve, kryeprokurori i SPAK-ut, Altin Dumani, paraqiti një material prej 50 faqesh, duke kërkuar kalimin e dosjes për gjykim.
Në anën tjetër pala që mbron biznesmenin Elman Abule, një prej të pandehurve, kërkoi pushimin e çështjes, ose në alternativë gjykim të shkurtuar. Ndërsa avokatët e personave të tjerë kërkuan kohë për t’u shprehur.
Kryebashkiaku Veliaj i është drejtuar GJKKO-së që t’i vihet në dispozicion një kopje fizike e dosjes që të ketë mundësi të përgatitet për mbrojtjen.
Veliaj pretendon se nuk i është lejuar që të lexojë asnjë faqe nga dosja dhe se USB-ja që i është dorëzuar avokatëve nuk mund të përdoret në paraburgimin e Durrësit.
Kryebashkiaku i Tiranës akuzohet nga SPAK për disa vepra penale si pastrim parash, mosdeklarim pasurie, korrupsion pasiv në 9 episode, shpërdorim detyre si dhe futje të sendeve të ndaluara në qeli.
Veliaj fitoi një betejë në Gjykatën Kushtetuese lidhur me procedurat e ndjekura për shkarkimin e tij nga posti i Kryetarit të Bashkisë. Dy javë më parë, Kushtetuesja vendosi që shkarkimi i Veliajt, i dirigjuar nga Kryeministri Edi Rama, ishte i paligjshëm. Në kushte të tilla, Veliajt iu dha e drejta të mbante funksionin e Kryebashkiakut, pavarësisht se prej 9 muajsh ndodhet në kushtet e arrestit me burg.
Pas vendimit të Kushtetueses, Kryeministri Edi Rama ndryshoi qëndrim në lidhje me Kryebashkiakun, duke i kërkuar Gjykatës që me të njëjtën mënyrë të gjykojë edhe kërkesën për lirimin e tij nga qelia.
Lini një Përgjigje