FLASH
Shkruar nga Pamfleti
Një muaj pas tragjedisë që tronditi Italinë, të gjithë përpiqen që t’i rikthehen normalitetit, por ajo që ndodhi mesnatën e 6 dhe 7 Majit nuk do të harrohet lehtë.
Bëhet fjalë për Taulant Malaj, i cili në tentativë për të vrarë gruan Tefta Malaj, goditi për vdekje të bijën Xhesika dhe italianin Massimo De Santis pasi dyshonte se ishte personi me të cilin e tradhtonte bashkëshortja. Kjo e fundit u plagos nga Taulnati, ndërsa i vetmi që shpëtoi pa u sulmuar ishte djali i tyre.
Shtëpia e italianit në rrugën Togliatti ka dalë në shitje ndërsa lokalet mbeten të hapura. Në zonën ku ndodhi ngjarja të gjithë duan të kenë një “ilaç” për të larguar kujtesën. Ata që vazhdojnë të jetojnë në atë kompleks rezidence, pothuajse në periferi të Torremaggiore, lëvizin sikur të mos kishte ndodhur asgjë. Por kur pyeten për ngjarjen, flasin shkurt duke thënë:
“Ishte një tragjedi e madhe. Askush nuk e priste. Gjithçka dukej normale”.
Në një prononcim për mediat italiane, vëllai i Massimo De Santis, pronarit 51-vjeçar që u vra nga dora e shqiptarit, u shpreh se ai nuk e meritonte të vdiste në atë mënyrë.
“Vëllai im nuk e meritonte të vdiste kështu. Do kisha preferuar një vdekje në rrethana të tjera, por ama ai nuk e meritonte një vdekje si kjo”, tregon Pasquale.
Për mediat ka folur edhe vëllai tjetër Gianluca, emri i të cilit qëndron në tabelën që është vendosur për shitje dhe aktualisht jeton mamaja e tyre 80-vjeçare.
“Mamaja ime nuk ka dalë kurrë vetëm nga shtëpia që nga dita e tragjedisë. Më duhet ta marr në katin e tretë dhe kur ajo del nga ashensori duke ngulur sytë drejt përpara si për të hequr imazhin e çarçafit të bardhë që mbulonte trupin e përgjakur të Massimo-s të shtrirë në tokë”, thotë Gianluca.
Në shkallën ku jetonte Massimo dhe familja shqiptare tashmë duket gjithçka normale. Mediat italiane shkruajnë se në citofon janë ende emrat e protagonistëve të tragjedisë. Aty ku dikur shtrihej trupi i pajetë i Massimo-s pas goditjeve të Taulant Malaj, tashmë është pastruar dhe është vendosur një vazo.
Kutia postare e familjes Malaj është e mbushur me letra. Në katin e parë, aty ku qëndronte familja shqiptare ka heshtje.
“Vëllai im ishte një djalë gazmor. I pëlqente të bënte shaka dhe ishte gjithmonë i disponueshëm. Edhe në mbrëmjen e vrasjes ai bëri shaka me punonjësit para se të mbyllte punën dhe të kthehej në shtëpi”, tregon Pasquale i cili ishte bashkëpronar me Massimo-n në lokalin Corso Matteotti.
“Kamerat e kanë kapur të ulur brenda lokalit duke bërë shaka me punonjësit. Është fotografia e tij e fundit. Më pëlqen ta kujtoj kështu, duke buzëqeshur”, thotë vëllai i italianit.
Lini një Përgjigje