FLASH
Shkruar nga Pamfleti
Ministria e Shëndetësisë, ka reaguar lidhur me gjendjen e 6-vjeçares nga Korça, e cila mbijetoi pasi shtëpia iu përfshi nga zjarri.
Sipas Ministrisë, bëhet me dije se aktualisht vajza e mitur është në gjendje kritike për jetën dhe po trajtohet në terapi intensive. Ndërkohë, në QSUT ka shkuar edhe Ministrja e Shëndetësisë dhe Mirëqenies Sociale, Evis Sala.
6-vjeçarja po merr trajtim nga mjekët pediatër, reanimatorë dhe specialistët e djegie-plastikës. Në reagim thuhet gjithashtu se Ministria e Shëndetësisë i shpreh ngushëllimet për humbjen e pjesëtarëve të familjes (nënës dhe vëllait) dhe po qëndron në komunikim me QSUT për gjendjen shëndetësore të së miturës.
“Në orët e mbrëmjes, në Qendrën Spitalore Universitare “Nënë Tereza” ka mbërritur për trajtim mjekësor 6-vjeçarja, N.A, e lënduar nga ngjarja e rëndë sot në qarkun e Korçës.
Pacientja u prit në urgjencën e Shërbimit të Djegie-Plastikës nga ekipi mjekësor, i cili ishte në komunikim të vazhdueshëm me mjekët, që e shoqëronin gjatë transportit nga Korça drejt Tiranës.
Pas vlerësimit të gjendjes shëndetësore, e mitura, aktualisht në gjendje kritike për jetën, u hospitalizua menjëherë në Shërbimin e Terapisë Intensive të Pediatrisë në QSUT, ku po trajtohet nga mjekët pediatër, reanimatorë dhe specialistët e djegie-plastikës, sipas të gjitha protokolleve mjekësore në fuqi.
Pak minuta, pas mbërritjes së 6 vjeçares, në QSUT ka mbërritur Ministrja e Shëndetësisë dhe Mirëqenies Sociale, Prof. Evis Sala, e shoqëruar nga drejtoresha e përgjithshme e QSUNT, Anxhela Paparizo dhe po ndjekin nga afër gjendjen e saj, në komunikim të vazhdueshëm me ekipin e përbashkët mjekësor të Shërbimit të Djegie-Plastikës dhe Shërbimit të Terapisë Intensive të Pediatrisë në QSUNT.
MSHMS shpreh ngushëllimet për humbjen e pjesëtarëve të familjes dhe po qëndron në komunikim me QSUT, minutë pas minute për gjendjen shëndetësore të së miturës”, thuhet në reagimin e Ministrisë.
Lini një Përgjigje