FLASH
Shkruar nga Pamfleti
Rafael Leao vazhdon të jetë një nga emrat më të përfolur të merkatos së verës, por zërat që e lidhnin me një transferim te Fenerbahçe janë hedhur poshtë nga vetë klubi turk.
Në ditët e fundit u raportua se gjiganti nga Stambolli ishte gati të investonte rreth 100 milionë euro për të siguruar shërbimet e sulmuesit portugez të Milanit, duke përfshirë si kartonin ashtu edhe pagën e lojtarit. Megjithatë, Fenerbahçe ka reaguar me një deklaratë zyrtare, duke mohuar kategorikisht ekzistencën e një oferte të tillë.
“Pretendimet se kemi bërë një ofertë prej rreth 100 milionë eurosh për Rafael Leaon, duke përfshirë kartonin dhe pagën e tij, nuk janë të vërteta. Nuk i kemi bërë asnjë ofertë lojtarit apo klubit të tij”, thuhet në deklaratën zyrtare të Fenerbahçes.
Pavarësisht këtij përgënjeshtrimi, e ardhmja e Leaos mbetet e paqartë. Sulmuesi portugez vazhdon të jetë në qendër të spekulimeve për një largim nga Milani, ndërsa drejtuesit e klubit kuqezi presin oferta konkrete për një nga lojtarët më të rëndësishëm të skuadrës.
Interesimi për 26-vjeçarin nuk mungon, me disa klube të mëdha europiane që monitorojnë situatën e tij. Ndërkohë, edhe emrat e Fenerbahçes dhe Gallatasarajit janë përmendur shpesh në media si destinacione të mundshme.
Për momentin, megjithatë, pista që e lidhte Leaon me Fenerbahçen është zyrtarisht e mbyllur, ndërsa merkatoja mbetet e hapur dhe Milani pret lëvizjet e radhës për yllin portugez.
Lini një Përgjigje