FLASH
Shkruar nga Pamfleti
Kryetarja e Gjykatës Kushtetuese, Holta Zaçaj ditën e sotme ka folur për disa pretendime që janë për publike javën e fundit në medias se gjyqtarët e këtij institucioni janë në përgjim nga SPAK.
Në një konferencë për mediat, ku ajo prezantoi raportin vjetor të këtij institucioni u shpreh se i është drejtuar me një shkresë kreut të SPAK, Altin Dumani për informacion, për ndonjë kallëzim apo hetim ndaj ndonjë gjyqtari.
Zaçaj tha se Gjykata mbështet çdo veprimtari të organeve ligjzbatuese në ushtrim të juridiksionit të tyre, duke theksuar “gjithmonë në përputhje me kompetencat që i njeh Kushtetuta dhe ligji”.
“Në lidhje me pyetjen tuaj Gjykata nuk ka asnjë informacion në lidhje mesa është shkruar për një përgjim të mundshëm apo të pretenduar ndaj gjyqtarëve të Gjykatës Kushtetuese. Pasi u informua në lidhje me këto lajme, trupa vendosi që t`i drejtohej zotit Altin Dumani me kërkesë për informacion, për ndonjë kallëzim apo hetim ndaj ndonjë gjyqtari, për sa kohë që veprimet e pretenduara i referohen një vendimmarrjeje konkrete të Gjykatës ku vetë SPAK është palë. Shkresa është dërguar zyrtarisht ditën e mërkurë, datë 19 shkurt. Ende nuk kemi një përgjigje zyrtare nga ai institucion.
Ndërkohë që si Kryetare e Gjykatës Kushtetuese informova zotin Dumani se nuk jam vënë në dijeni nga asnjë gjyqtar për ndonjë ndërhyrje apo ushtrim të ndonjë forme ndikimi të papërshtatshme nga avokatë, funksionarë politikë, publikë ose subjekte të tjera, bazuar në nenin 10, pika 3, të ligjit organik.
Gjykata mbështet çdo veprimtari të organeve ligjzbatuese në ushtrim të juridiksionit të tyre, gjithmonë në përputhje me kompetencat që i njeh Kushtetuta dhe ligji”, u përgjigj Zaçaj.
Gjatë këtyre ditëve në studiot televizive është folur se Prokuroria e Posaçme ka vënë në përgjim anëtarë të Gjykatës Kushtetuese, nën dyshimet për abuzim me detyrën.
Zëra të ndryshëm publikë, përfshirë edhe ish-kryeministrin Sali Berisha, kanë ngritur më herët shqetësimin se Gjykata Kushtetuese gjendet nën presion për vendimmarrjen mbi “Sky/ECC” nga rryma të ndryshme të interesuara./Pamfleti
Lini një Përgjigje