FLASH
Shkruar nga Pamfleti
Avokati i 68-vjeçarit Ilia Drini, i cili ndërroi jetë në ambientet e Gjykatës Penale të Tiranës paraditen e sotme ka treguar për mediat se i moshuari ishte i pandehur për përndjekje nga ish-bashkëjetuesja.
“E kam ndjekur që në kallëzimin e parë në 2020. Ishte kallëzuar nga ish-partnerja pasi e përndiqte. I bënin presion familjarët asaj. Nuk e di pse do takoheshin sot”, tha avokati, Ndue Pjetra.
Në dosje thuhet se ish-partnerja e 68-vjeçarit, nga dhuna dhe presioni ka tentuar që të vriste veten.
Mësohet se viktima po qëndronte i ulur në stol, kur i ka rënë infarkt. Kur ambulanca ka shkuar në institucionin e drejtësisë, mësohet se Ilia Drini kishte ndërruar jetë.
Sipas avokatit, akuza ndaj tij kishte ndryshuar nga “përndjekje personi” në “shkaktim vetëvrasje” pa u mbajtur seancat përkatëse.
“Nuk duhen shtyrë gjyqet, 3 muaj me radhë… Akuzohej fillimisht për përndjekje, por pastaj për shkaktim vetëvrasje. Ngjarja ka ndodhur në 2020-ën. Ishte e dashura e tij, ose bashkëjetuesja nuk e di shumë mirë, ajo kishte bërë një kallëzim penal e nxitur nga të tjerët që t’i merrte pasurinë. Ai ka nja 3 vjet që jetonte vetëm, ishte profesor i arteve marciale, një njeri shumë i nderuar”, deklaroi avokati i të ndjerit.
Pretendimi i këtij të fundit është se ish-bashkëjetuesja e 68 vjeçarit e “nxitur” nga të tjerët kishte ngritur padi penale ndaj tij për t’i marrë pasurinë. Madje avokati shprehet se familjarët e saj donin ta martonin me çdo kusht me të!
Theksojmë se ish-bashkëjetuesja, bazuar te dosja, është 37 vjeç. Në dëshminë e saj, ajo shprehej se si pasojë e gjendjes së rënduar psikologjike kishte tentuar të vetëvritej me mbidozë ilaçesh.
"Diçka kishte, e dinte datën 1, por mund të kishte ndonjë presion nga të tjerët. Mendoj se duhet hetuar nga Prokuroria, duhen parë tabulatet telefonike, donin ta martonin patjetër me bashkëjetuesen. Nuk vuante fare, nuk kishte asnjë gjë, i fuqishëm, 68 vjeç. Ishte mbajtur një seancë më parë, por gjykata se kishte njoftuar avokatin, pretendonin me çdo kusht ta martonin, familjarët e bashkëjetueses. Data 1 Shkurt 2024 ishte seanca e parë. Dosja ishte dorëzuar nga data 27 Tetor 2022. Jemi ende në seancë paraprake. O zotëri u kemi thënë që gjykatësit që lëvizin nga një rreth në tjetrin duhet ti mbarojnë çështjet vetë. Seanca nuk u hap se kanë ikur gjyqtarët, vinte ndonjë tjetër. 30 ditë është afati…Ne kemi marrë njoftim vetëm për datën e seancës, ne e dinim çështjen e mbyllur. Këtë informacion e kemi marrë pasi erdhi fletëthirrja për datën 1 Janar.
Ata bashkëjetonin në atë kohë, por ajo vuante nga një sëmundje e rëndë dhe në këto kushte e detyruan të bënte këtë kallëzim, ishin intrigat…I bënin presion familjarët asaj”, tha avokati i Drinit.
Avokati thotë gjithashtu se 13 klientë të tij kanë vdekur deri tani duke pritur gjyqin.
“Ne u vumë në dijeni dhe ne i këna prit këto gjona. Ne i vumë në dijeni gjithë institucionet që drejtësia e vonuar kështu do të përfundojë. Deri më tani mbi 13 klientë të mi kanë vdekur duke pritur gjyqin. I thonë 6 vjet 7 vjet, vetëm nga shkalla e parë në Apel. Gjykata vërtetë është e vështirë, duhet të dalin të shtunë e të diele të bëjnë gjyqe, jo t’i shtyjnë gjyqet me 5 muaj”, tha avokati.
Lini një Përgjigje