FLASH
Shkruar nga Pamfleti
Merkato verore 2025/26 në Serie A është mbyllur zyrtarisht dhe ditët e fundit sollën disa lëvizje të bujshme që pritet të ndryshojnë balancat e kampionatit italian.
Udinese ka bërë dy goditje të rëndësishme. Sulmuesi 19-vjeçar Idrissa Gueye vjen nga Metz në formë huazimi me detyrim blerjeje, pavarësisht interesit të fortë nga West Ham dhe Manchester City. Në të njëjtën kohë, friulianët kanë mbyllur zyrtarisht edhe marrëveshjen me Nicolò Zaniolon, kontrata e të cilit u dorëzua në Legë dhe u konfirmua në rrjetet sociale të klubit.
Andrea Belotti është futbollisti më i ri i Cagliarit. Kontrata është nënshkruar dhe pritet vetëm regjistrimi në Ligë për ta bërë zyrtare.
Edon Zhegrova ka bërë hapin e madh të karrierës duke u transferuar te Juventusi. Klubi bardhezi ka arritur marrëveshje me Lille për 20 milionë euro plus 5 milionë bonuse.
Një tjetër surprizë e madhe vjen nga Napoli. Presidenti Aurelio De Laurentiis konfirmoi në platformën X nënshkrimin e Rasmus Højlund, duke e kthyer danezin në sulmuesin më të ri të skuadrës.
Milan është drejt finalizimit të kontratës me Adrien Rabiot. Dokumentet janë dorëzuar, duke e bërë mesfushorin francez praktikisht një lojtar të Rossonerëve, edhe pse pritet ende njoftimi zyrtar.
Cremonese ka mbyllur marrëveshjen për mbrojtësin e talentuar senegalez Mikayil Faye (2004), i cili vjen nga Stade Rennais në formë huazimi me opsion blerjeje.
Në orët e fundit të merkatos, Galatasaray ka hyrë fuqishëm në garë për Ademola Lookman, por Atalanta kërkon 55 milionë euro për të lënë sulmuesin të largohet. Bisedimet vijojnë.
Como ka forcuar radhët me mbrojtësin Stefan Posch nga Bologna dhe brazilianin Diego Carlos. Të dy kontratat janë dorëzuar në Legë, duke bërë transferimet zyrtare.
Në Gjermani, Victor Boniface i është bashkuar Werder Bremenit pas dështimit të kalimit te Milan. Ai shkon në huazim 1-vjeçar me opsion blerjeje prej 24 milionë eurosh.
Ndërkohë, Nico González largohet nga Juventusi pas vetëm një sezoni. Ai i është bashkuar Atlético Madrid në formë huazimi me të drejtë blerjeje, që mund të bëhet detyrim nëse përmbushen kushtet gjatë sezonit.
Merkato mbyllet, por surprizat që solli pritet të reflektohen shpejt në fushën e lojës. Serie A hyn në një sezon të ri me fytyra të freskëta dhe transferime që mund të ndryshojnë garën për titullin.
Lini një Përgjigje