FLASH
Shkruar nga Pamfleti
Grumbullimi i fundit i Kombëtares shqiptare ka rikthyer në vëmendje një fenomen të njohur në historinë e futbollit kuqezi: futbollistët e lindur ose të rritur jashtë vendit që zgjedhin të përfaqësojnë Shqipërinë. Thirrja e mbrojtësit të AEK-ut, Stavro Pilo, nga trajneri Silvinjo, përbën rastin më të fundit të këtij realiteti, i cili lidhet ngushtë me historinë e emigracionit dhe identitetin sportiv shqiptar.
Në të njëjtën linjë vendoset edhe rasti i Bujar Pllanës, i cili ka qenë pjesë e përfaqësueseve të moshave të Kosovës, por së fundmi ka vendosur të veshë fanelën kuqezi.
Stavro Pilo, 25 vjeç, i lindur në Rodos nga prindër shqiptarë, bëhet futbollisti i shtatë i lindur në Greqi që përfaqëson Shqipërinë në nivelin e parë. Ky trend e rendit Shqipërinë ndër vendet me numër të lartë lojtarësh nga diaspora, pas Kosovës dhe Zvicrës.
Lista e futbollistëve të lindur në Greqi që kanë kontribuar për Kombëtaren përfshin emra si Thomas Strakosha, Mario Mitaj dhe Enea Mihaj, të cilët vijojnë të jenë pjesë aktive e ekipit. Ndërkohë, lojtarë si Stivian Janku dhe Ardit Toli kanë dhënë kontributin e tyre në ndeshje të ndryshme, duke përfaqësuar një brez të rritur jashtë Shqipërisë, por të lidhur me të përmes zgjedhjes sportive.
Në historinë e Kombëtares spikat edhe një rast i veçantë, ai i Xhakomo Poselit. I lindur në Selanik në vitin 1921 nga një familje me origjinë italiane, ai mbetet futbollisti i vetëm që ka luajtur për Shqipërinë pa pasur origjinë shqiptare.
Familja e tij u vendos në Vlorë kur ai ishte 11 vjeç, ku edhe nisi rrugëtimin në futboll. Si portier i Flamurtarit, Poseli tërhoqi vëmendjen dhe në vitin 1946 mori shtetësinë shqiptare. Ai debutoi më 13 tetor 1946 në fitoren 1-0 ndaj Rumanisë, në një periudhë kur futbolli shqiptar po rindërtohej pas Luftës së Dytë Botërore.
Rasti i tij konsiderohet simbol i hershëm i ndërthurjes së kulturave në sportin shqiptar.
Përveç lojtarëve që zgjedhin Shqipërinë, ka edhe raste të kundërta. Futbollistë si Sotir Nini, Panajot Kone, Fiorin Durmishaj dhe Andrea Ndoj kanë vendosur të përfaqësojnë Greqinë, ndonëse kanë lidhje shqiptare. Një tjetër shembull është Kristos Tzolis, me origjinë familjare nga Dhrovjani i Vlorës, i cili gjithashtu ka zgjedhur kombëtaren greke.
Këto raste tregojnë se përzgjedhja e një kombëtareje është shpesh një vendim personal, i ndikuar nga faktorë të ndryshëm si identiteti, mundësitë sportive, zhvillimi i karrierës dhe konteksti ku janë rritur lojtarët.
Një tjetër emër që ka shprehur interes për Kombëtaren shqiptare është Tomas Guidara. Mbrojtësi arbëresh, i lindur dhe rritur në Argjentinë, ka deklaruar në një intervistë për “Panorama Sport” se dëshiron të luajë për Shqipërinë.
Sipas tij, njohja me rrënjët arbëreshe ka rritur interesin për prejardhjen dhe lidhjen me vendin e të parëve, duke e bërë Shqipërinë një opsion real për të ardhmen.
Lini një Përgjigje