FLASH
Shkruar nga Pamfleti
Korinthians ka vendosur të mos emërojë Silvinjon si trajner të ri të skuadrës, duke i dhënë fund spekulimeve të ditëve të fundit. Klubi brazilian prezantoi zyrtarisht Fernando Diniz si teknikun e ri, duke mbyllur kështu çdo mundësi për rikthimin e trajnerit të Kombëtares shqiptare në pankinën e ekipit.
Diniz, 52 vjeç, vjen pas eksperiencës së fundit në drejtimin e Vasco da Gamës, gjithashtu në Brazil.
E ardhmja e Silvinjos mbetet e hapur
Silvinjo është aktualisht në krye të Kombëtares shqiptare dhe më herët ka deklaruar se do të respektojë kontratën me Federatën Shqiptare të Futbollit deri në muajin korrik. Pas këtij afati, e ardhmja e tij mbetet ende e paqartë.
Nga ana tjetër, FSHF nuk ka bërë ende një njoftim zyrtar për vijimësinë e bashkëpunimit me trajnerin brazilian, duke lënë të hapura të gjitha opsionet. Raportimet sugjerojnë se largimi i tij është një mundësi reale, sidomos pas dështimit në fazën “play-off” për Botërorin.
Interesi i mëparshëm i Korinthians
Sipas mediave braziliane, përfshirë portalin “bolavip.br”, Silvinjo ishte përfshirë në listën e kandidatëve për të marrë drejtimin e Korinthians pas dorëheqjes së Dorival Junior. Një nga arsyet kryesore për këtë interes ishte njohja e mirë që ai ka me klubin, çka do të shmangte një periudhë adaptimi.
Megjithatë, drejtuesit e klubit vendosën të lëvizin shpejt për shkak të kalendarit të ngjeshur të ndeshjeve, që përfshin përballje në Copa Libertadores dhe kampionatin vendas.
E kaluara e Silvinjos te Korinthians
Silvinjo ka një histori të mëparshme me Korinthians, si trajner dhe si futbollist. Ai drejtoi ekipin nga maji i vitit 2021 deri në shkurt 2022, periudhë që përfundoi me dorëheqjen e tij pas një humbjeje ndaj Santos.
Gjatë kësaj kohe, ai regjistroi 44 ndeshje në krye të skuadrës, me bilanc prej 17 fitoresh, 14 barazimesh dhe 13 humbjesh. Më herët, ai kishte qenë pjesë e klubit edhe si lojtar në vitet 1994–1999.
Kandidatët e tjerë në garë
Përveç Silvinjos, në listën e kandidatëve për pankinën e Korinthians përmendeshin edhe emra të tjerë të njohur si Carlos Carvalhal, Bruno Lage, Tite, Marcelo Gallardo dhe Juan Pablo Vojvoda.
Lini një Përgjigje