FLASH
Shkruar nga Pamfleti
Edoardo Bove është emri që prej ditësh po mban në tension tifozët anembanë globit, për shkak të gjendjes së tij shëndetësore, pas kolapsit që pësoi të dielën e shkuar në fushë, në sfidën mes Fiorentinës e Interit në Artemio Franchi.
Edoardo Bove, siç pritej, iu nënshtrua një operacioni mëngjesin e sotëm në orën 7.30 për vendosjen e një defibrilatori nënlëkuror. Operacioni rezultoi i suksesshëm dhe u krye në spitalin Careggi të Firences, aty ku 22-vjeçari qendron i shtruar prej ditës së mërkurë.
Bove pritet të lërë spitalin të mërkurën ose të enjten. Sipas protokollit mjekësor, mesfushorit italian i duhej vendosur ky defribiliator për shkak të problemeve kardiake, me të cilat ai u paraqit në spital.
Pas daljes nga spitali, Bove pritet të shkojë në kampin stërvitor të Fiorentinës për t’u përshëndetur me shokët e skuadrës e stafin e për të pritur më pas vlerësimin përfundimtar të ekipit mjekësor lidhur me mundësitë konkrete si dhe afatet për rikthimin në fushën e lojës të mesfushorit 22-vjeçar.
Lini një Përgjigje