FLASH
Shkruar nga Pamfleti
Trajneri i PSG-së, Luis Enrike, ka paralajmëruar një përballje shumë të fortë ndaj Arsenalit në finalen e Ligës së Kampioneve, sfidë që do të zhvillohet më 30 maj në Budapest. Tekniku spanjoll vlerësoi maksimalisht skuadrën londineze, duke theksuar cilësitë e saj si në fazën sulmuese, ashtu edhe në organizimin pa top.
“Do të jetë një finale e vështirë mes dy skuadrave që kanë qasje të ndryshme. Arsenali e meritoi kampionatin pas një sezoni të shkëlqyer. U përballëm një herë me ta, i njohim cilësitë e tyre në shënimin e golave dhe në lojën pa top janë skuadra më e mirë në botë, pa dyshim”, deklaroi Luis Enrike.
Trajneri asturian ndaloi gjithashtu te puna e homologut të tij, Mikel Arteta, për të cilin pati vetëm fjalë vlerësuese, duke e konsideruar si arkitektin e mentalitetit fitues tek Arsenali.
“Ishte trajneri Mikel Arteta ai që përçoi këtë mentalitet fituesi tek Arsenali. Ata janë përmirësuar vit pas viti në këto katër apo pesë sezonet e fundit”, shtoi tekniku i PSG-së.
Në fund, Luis Enrike komentoi edhe forcën e Arsenalit në goditjet standarde, duke theksuar se skuadra e tij do të mundohet të ruajë organizimin mbrojtës.
“Do të kërkojmë të mbrohemi si zakonisht. Jemi një skuadër shtatshkurtër, por mbrohemi mirë në goditjet standarde”, përfundoi ai.
Lini një Përgjigje