FLASH
Shkruar nga Pamfleti
“The Athletic” ka bërë një analizë për atë se si Burnley thuajse papritur ka ngjallur shpresat për të qëndruar në Premier League. Tetë xhiro para fundit, Burnley mban pozitën e 19-të me 18 pikë. Lutoni e Nottinghami kanë katër pikë më shumë, dy vende më lart. Vendi i 17-të siguron mbetjen në elitën angleze.
Një nga protagonistët për kthimin në garë të Burnleyt është edhe portieri i Kosovës, Aro Muriç. Shtatlarti e fitoi rastin në dy ndeshjet e fundit dhe Burnley mori dy rezultate pozitive. Fitoi 2:1 ndaj Brentfordit dhe barazoi 2:2 me Chelsean. Në të dy ndeshjet 25-vjeçari shkëlqeu dhe mund të jetë në portë deri në fund të edicionit.
“Arijanet Muriç po ofron siguri”, shkruan “The Athletic”.
“Ishte i vetmi zëvendësim që trajneri Vincent Kompany nuk kishte provuar. Por pas 28 xhirosh me besim të palëkundur në transferimin e verës, James Trafford, Kompany vendosi të ndërrojë portierin. Muriç ishte i jashtëzakonshëm në Championship që përfundoi me titull edicionin e kaluar. Bëri vend në ekipin më të mirë të edicionit, sipas votimit të lojtarëve. Ishte pjesë e ekipit që mburrej me bilancin më të mirë në mbrojtje. Kombinoi ndaljen e gjuajtjeve me kualitetin gjatë posedimit të topit”, ka analizuar “The Athletic”.
Sipas “The Athletic”, shumë kanë vlerësuar se portieri i Kosovës u zëvendësua pa të drejtë nga Trafford, që u transferua nga Manchester City për 15 milionë funte.
“I kufizuar që të luajë në ndeshjet për Kupë, Muriçit i ishte mohuar shansi për të dëshmuar që ka kualitetin për Premier League. Ai u kthye në fitoren ndaj Brentfordit dhe të shtunën bëri hapin tutje. Muriç bëri 11 pritje, disa prej tyre vendimtare. Numrin e pritjeve e kombinoi me shpërndarjen e duhur të topave”, thuhej më tej në analizën e “The Athletic”, teksa thekson se Muriç është i denjë për Premier League dhe se bashkëlojtarët i besojnë atij.
“Pyetja tani është se ku do të ishte Burnley sot nëse Muriç do të kishte nisur edicionin në portë, apo do të fitonte rastin më herët”, përfundon artikulli i The Athletic.
Lini një Përgjigje