FLASH
Shkruar nga Pamfleti
Lionel Mesi vazhdon të zgjerojë vendin e tij në historinë e futbollit botëror. Pas kualifikimit të Argjentinës në finalen e Kupës së Botës 2026, ku do të përballet me Spanjën, kapiteni i "Albiceleste" është gati t'i shtojë edhe një arritje të madhe karrierës së tij të jashtëzakonshme.
Superylli 39-vjeçar do të luajë finalen e tretë të Kupës së Botës në karrierë, një arritje që e vendos atë në një grup shumë të kufizuar futbollistësh që kanë arritur tri herë deri në ndeshjen vendimtare të turneut më të madh të futbollit.
Finalja e tij e parë ishte në Botërorin e vitit 2014 në Brazil, ku Argjentina u mposht 1-0 nga Gjermania pas kohës shtesë.
Tetë vjet më vonë, në Katar 2022, Mesi udhëhoqi Argjentinën drejt fitimit të Kupës së tretë të Botës në historinë e saj, pasi mposhti Francën në një finale që konsiderohet tashmë një nga më të mirat e të gjitha kohërave.
Tashmë, në Botërorin 2026, ai do të synojë trofeun e dytë personal përballë kampiones së Evropës, Spanjës, duke pasur mundësinë të shkruajë një tjetër kapitull të artë në karrierën e tij.
Deri më sot, futbollisti i vetëm që ka qenë titullar në të tre finalet e Kupës së Botës ku ka marrë pjesë është legjenda braziliane Kafu. Mbrojtësi ishte pjesë e formacionit bazë të Brazilit në finalet e viteve 1994, 1998 dhe 2002, duke fituar dy herë trofeun.
Në listën e futbollistëve me tri finale të Kupës së Botës bëjnë pjesë edhe emra legjendarë si Pele, Ronaldo Nazário, Lothar Matthäus dhe Pierre Littbarski. Megjithatë, asnjëri prej tyre nuk luajti si titullar në të tre finalet, pasi në një prej tyre ose e nisi ndeshjen nga stoli, ose mungoi për shkak dëmtimi.
Lini një Përgjigje