FLASH
Shkruar nga Pamfleti
Rajo Vajekano e Ivan Balliut, skuadra simbol e lagjes së klasës punëtore në Madrid, rikthehet në garat evropiane pas 25 vitesh. Ndryshe nga gjigantët e qytetit, Real Madrid dhe Atletiko, Rajo përfaqëson Madridin periferik. Në këtë edicion, Vajekas do të përballet me dy klube shqiptare, Dritën dhe Shkëndijën, si dhe me Leh Poznan në Ligën e Konferencës.
Stadiumi “Vajekas”, i njohur për tarracat e tij prej betoni dhe atmosferën autentike, mbetet një simbol i tifozërisë së zjarrtë. Megjithatë, marrëdhënia me drejtuesit ka qenë sfiduese. Presidenti Raul Martin Presa, jo tifoz i Rajos, ka një vizion biznesi që shpesh nuk përputhet me vlerat e tifozëve.
Pas një sezoni të suksesshëm, Rajo siguroi pjesëmarrjen në Ligën e Konferencës, duke ndezur festimet në Vajekas. Rikthimi evropian pas paraqitjes së vetme në UEFA Cup 2000-2001, ku skuadra arriti çerekfinalet, i sjell tifozëve emocionet e futbollit kontinental.
Tifozët kanë mundësi të ndjekin të tre ndeshjet e Ligës së Konferencës me një biletë sezonale speciale prej vetëm 60 eurosh. Atmosfera në stadium mbetet e jashtëzakonshme, radhët për bileta mund të zgjasin 6-7 orë dhe tifozët shpesh vijnë që herët për të siguruar vendet më të mira. Vajekano mbetet ende klubi që nuk i shet biletat online.
Në fushë, Rajo ka idhujt e vet si Isi Palazon, i refuzuar nga Reali i Madridit dhe Vijarreali në rininë e tij, sot është shpirti i Rajos dhe simbol i forcës për komunitetin. Ndërkohë, Ivan Balliu që përfaqëson Shqipërinë në garat ndërkombëtare është pjesë e klubit prej vitesh.
Rajo Vajekano, një lagje e vogël punëtore, rikthehet në Evropë me një histori të pasur, nostalgji dhe ëndrrat e një komuniteti që nuk ka harruar rrënjët e tij. Vajekas ëndërron sërish.
Lini një Përgjigje