FLASH
Shkruar nga Pamfleti
Kukësi ka siguruar një fitore shumë të rëndësishme në ndeshjen e javës së 9 ndaj Laçit, për t’iu larguar fundit të tabelës së klasifikimit. Verilindorët kanë mposhtur kurbinasit me shifrat 1-0 duke ndaluar këta të fundit që të barazonin përkohësisht Egnatian në kreun e renditjes.
Ndeshja ishte e ekuilibruar, me pak raste nga të dy skuadrat në pjesën e parë të sfidës, pasi mbrojtjet ishin shumë të kujdesshme për të mos lejuar hapësira. Goli i vendasve erdhi vetëm në pjesën e dytë me Abdou, i cili shfrytëzoi më së miri shansin e parë që iu shfaq sapo u fut në fushën e lojës.
Më pas, verilindorët ishin të kujdesshëm në prapavijë, teksa tentuan me kundërsulme edhe të mbyllnin ndeshjen, duke krijuar e shpërdoruar raste të njëpasnjëshme para Dajsinanit.
Gjithsesi, në fund edhe ai gol i vetëm u mjaftoi për tre pikët, të cilat i largojnë për momentin nga fundi i renditjes së kampionatit ku kanë qenë gjatë javëve të fundit.
Lini një Përgjigje