FLASH
Shkruar nga Pamfleti
Kombëtarja e Turqisë do të zhvillojë ndeshjen e fundit në fazën e grupeve të Botërorit ndaj Shteteve të Bashkuara në stadiumin "SoFi", tashmë pa shanse për kualifikim. Një situatë që trajneri Vinçenco Montela nuk e kishte parashikuar, pasi synonte që skuadra e tij të mbërrinte në këtë sfidë si kryesuese e grupit.
Në konferencën për shtyp para ndeshjes, tekniku italian reagoi ashpër ndaj kritikave dhe zërave që kërkojnë largimin e tij nga drejtimi i kombëtares.
"Nuk jap dorëheqjen dhe nuk dorëzohem. Kam ende energji, entuziazëm dhe një zhguall akoma më të fortë, përtej mbështetjes së Federatës. Nëse dikush dëshiron që unë të largohem, ta mbledhë mendjen se kjo nuk do të ndodhë", deklaroi Montela.
Përpara se t'u përgjigjej pyetjeve të gazetarëve, Montela mbajti një fjalim në mbrojtje të futbollistëve të tij, duke i cilësuar të padrejta kritikat e ditëve të fundit.
"Këta futbollistë meritojnë më shumë respekt nga sa u është dhënë. Ata janë krenaria dhe djemtë e një vendi. Janë djemtë e mi, djemtë tuaj. Duhet të mbrohen, të kritikohen kur është e nevojshme, por kurrë në aspektin personal dhe me tone fyese, siç ka ndodhur këto ditë. Si mund të thuhet se humbëm sepse nuk kishte unitet dhe vëllazëri në këtë kombëtare? Ne jemi vërtet një familje. Jashtë hotelit tonë në Los Angeles ishin vetëm tre persona që na kundërshtuan, por ata u bënë më shumë lajm sesa qindra tifozët që na mbështetën. Kjo është e papranueshme", u shpreh trajneri.
Montela mbrojti gjithashtu punën e bërë që prej marrjes së drejtimit të kombëtares, duke vënë në dukje statistikat e ekipit në këtë Botëror, pavarësisht eliminimit.
"Jemi ndër ekipet e para për aksionet në zonën kundërshtare, për veprimet në 25 metrat e fundit të fushës, të dytët për hyrjet në zonën kundërshtare dhe të tretët për rastet e krijuara. Është e vërtetë që duhet të shënosh dhe ne nuk ia dolëm, ndaj kemi gabuar në diçka, por ishim shumë pranë. Nëse qoftë edhe një nga 61 gjuajtjet tona në dy ndeshje do të ishte kthyer në gol, sot do të tregonim një histori tjetër. Për këtë arsye nuk mund të shkatërrojmë gjithçka dhe i kërkoj popullit turk të na qëndrojë pranë", përfundoi Montela.
Lini një Përgjigje