FLASH
Shkruar nga Pamfleti
Pasi fitoi titullin kampion një javë më parë në derbi ndaj Milanit, Interi nuk është ndalur edhe në sfidën pasardhëse. Zikaltrit fituan 2-0 në shtëpi ndaj Torinos, duke e bërë edhe më të bukur festën me tifozët që do të pasojnë në “Piazza Duomo”.
Pjesa e parë pati disa raste të mira shënimi për vendasit, por gjithsesi, ky fraksion u mbyll pa gola. E dyta nisi keq për miqtë, që u detyruan të luanin me 10 lojtarë pas daljes me karton të kuq të Tameses. Për këtë u desh edhe ndërhyrja e VAR.
Dhe nuk vonoi shumë, Çalhanoglu zhbllokoi sfidën në minutën e 56 pas një pasimi të Mkitarian. Ende pa u shuar jehona e festës së golit të parë, zikaltrit përfituan penallti dhe turku nuk fali nga pika e bardhë për 2-0 kur regjistrohej minuta e 60-të.
Më pas Çalhanoglu i la vendin Kristjan Asllanit, që hyri në fushë në minutën e 63. Në po të njëjtin minutë hyri edhe kosovari Vojvoda për miqtë. Pavarërisht se Interi krijoi edhe disa raste të tjera shënimi, nuk pati më gola. Kjo fitore vlen në aspektin e statistikave për Inzagin dhe kampionët e rinj, të cilët do të festojnë titullin gjithë pasdites në rrugët e Milanos me tifozët.
Kjo ishte një ndeshje historike, pasi ka qenë e para e drejtuar nga një ekip arbitrash të përbërë vetëm nga femra.
Lini një Përgjigje