FLASH
Shkruar nga Pamfleti
Ernest Muçi ka tërhequr vëmendjen e tregut anglez pas paraqitjeve me Trabzonsporin në kampionatin turk.
Sulmuesi i Kombëtares shqiptare, i huazuar nga Beshiktashi, ka bindur drejtuesit e Trabzonsporit për një transferim përfundimtar në verë. Megjithatë, mediat turke raportojnë se e ardhmja e tij mbetet e hapur për shkak të interesit nga Anglia.
Sipas këtyre burimeve, dy klube angleze do të dërgojnë skautë për ta ndjekur Muçin në ndeshjen e fundjavës ndaj Fenerbahçes. Takimi konsiderohet direkt për renditjen në Superligën turke, çka e rrit peshën e performancës individuale të çdo lojtari.
Muçi do të përballet me një nga skuadrat kryesore të kampionatit, në një ndeshje me intensitet të lartë dhe presion rezultati. Vëzhgimi i tij në një sfidë të tillë do të shërbejë si test për interesimin konkret të klubeve angleze.
Pak javë më parë, presidenti i Trabzonsporit deklaroi publikisht se klubi kishte marrë oferta të rëndësishme për lojtarë të huazuar. Mediat turke lidhën këtë deklaratë pikërisht me Ernest Muçin, duke e identifikuar si një nga emrat më të kërkuar.
Vendimi përfundimtar për të ardhmen e sulmuesit pritet të ndikohet nga zhvillimet e javëve në vijim dhe nga oferta konkrete që mund të paraqiten gjatë merkatos verore.
Lini një Përgjigje