FLASH
Shkruar nga Pamfleti
Trajneri italian Karlo Ançeloti pritet të rinovojë kontratën me përfaqësuesen e Brazilit, ndonëse ka më pak se një vit në krye të skuadrës dhe rezultatet deri tani nuk janë konsideruar bindëse.
Sipas burimeve nga “ESPN”, marrëveshja e re është pothuajse e përfunduar dhe gëzon miratimin e të dyja palëve. Përfaqësues të Federatës Braziliane kanë konfirmuar se detajet janë diskutuar më herët dhe pritet vetëm formalizimi i kontratës pas përfundimit të ndeshjeve miqësore.
“E kemi diskutuar deri në detaje, kemi folur para se të largoheshim nga Brazili dhe kemi rënë dakord që pas ndeshjeve miqësore të firmosim marrëveshjen e re”, është shprehur Samir Çaud nga Federata Braziliane.
Edhe vetë Ançeloti ka lënë të kuptohet se nuk ka pengesa për vazhdimin e bashkëpunimit. “Federata nuk ka probleme të rinovojë dhe as unë nuk kam. Nuk mendoj se do të kemi probleme”, ka deklaruar ai.
Sipas të njëjtave burime, trajneri italian, i cili aktualisht ka kontratë deri në fund të Botërorit 2026, pritet ta zgjasë marrëveshjen deri në vitin 2030. Kontrata e re parashikon një formulë 2+2, duke u dhënë palëve mundësinë e ndërprerjes së bashkëpunimit pas dy vitesh.
Ançeloti do të vazhdojë të jetë trajneri më i paguar në historinë e përfaqësueses braziliane, me një pagë vjetore prej rreth 10 milionë eurosh. Objektivi kryesor mbetet ndërtimi i një skuadre konkurruese për Botërorin e ardhshëm.
Lini një Përgjigje