FLASH
Shkruar nga Pamfleti
Aktori amerikan Robert Carradine ka ndërruar jetë në moshën 71-vjeçare. Lajmi është konfirmuar nga familja e tij, e cila bëri të ditur se artisti i dha fund jetës pas një beteje të gjatë me çrregullimin bipolar.
Në një reagim publik, familjarët theksuan se ai kishte përjetuar prej vitesh sfida të thella me shëndetin mendor. Vëllai i tij, Keith Carradine, u shpreh se Roberti ishte përballur me vështirësi emocionale të vazhdueshme, ndërsa familja vendosi ta ndajë këtë realitet të dhimbshëm për të rritur ndërgjegjësimin mbi rëndësinë e trajtimit të shëndetit mendor dhe për të luftuar stigmën që shpesh e shoqëron atë.
Robert Carradine ishte pjesë e një dinastie të njohur artistësh. Babai i tij, John Carradine, ishte një figurë e respektuar e Hollivudit klasik, ndërsa vëllai i tij, David Carradine, u bë i famshëm për rolet në filma dhe seriale televizive që lanë gjurmë në kulturën pop.
Karrierën në ekran e nisi në vitin 1972 me filmin The Cowboys, ku luajti përkrah ikonës së kinemasë John Wayne. Më pas, ai u përfshi në projekte të rëndësishme si Mean Streets të regjisorit Martin Scorsese, si dhe në dramën e vlerësuar Coming Home, e cila u nominua për çmime Oscar.
Megjithatë, roli që e ktheu në një figurë ikonike për publikun ishte ai në komedinë Revenge of the Nerds, një sukses i madh komercial që solli edhe disa vazhdime dhe e shndërroi në një simbol të kulturës pop të viteve ’80.
Brezi më i ri e njohu përmes serialit Lizzie McGuire, ku interpretoi rolin e Sam McGuire, babait të personazhit kryesor të luajtur nga Hilary Duff.
Robert Carradine lë pas vajzën e tij, aktoren Ever Carradine, si dhe dy fëmijë të tjerë.
Lini një Përgjigje