FLASH
Shkruar nga Pamfleti
Mosmarrëveshjet për ndërmarrjet komunale çojnë në ndërprerje të bashkërendimit
Një konflikt i brendshëm në Lidhjen Demokratike të Kosovës në Prishtinë ka dalë në sipërfaqe, duke vendosur përballë kryetarin e partisë, Lumir Abdixhikun, dhe kryetarin e Komunës, Përparim Ramën.
Situata është përshkallëzuar ditët e fundit, kur raportet mes tyre kanë hyrë në një fazë të tensionuar dhe bashkërendimi politik është ndërprerë. Rama kishte marrë më parë mbështetje të plotë nga strukturat e LDK-së dhe konsiderohej si një nga projektet kryesore politike të Abdixhikut në kryeqytet, por zhvillimet e fundit tregojnë ndryshim në këtë raport.
Në qendër të përplasjes qëndron ndërmarrja publike Termokos dhe çështja e ndikimit në drejtimin e saj. Në këtë kuadër përmenden Arton Ratkoceri dhe Shkumbin Gashi, të cilët, sipas vlerësimeve brenda rrethit të Ramës, po tentojnë të ndikojnë në vendimmarrjen për ndërmarrjet komunale, shkruan Sinjali.
Rama ka kundërshtuar këtë qasje dhe ka kërkuar që ndërmarrjet e Prishtinës të menaxhohen pa ndërhyrje nga jashtë Komunës. Kjo mospajtim ka ndikuar në përkeqësimin e komunikimit mes palëve.
Brenda strukturave të LDK-së në Prishtinë po qarkullon mesazhi se “rrugët janë ndarë”. Abdixhiku ua ka komunikuar këtë disa drejtuesve të degëve dhe bashkëpunëtorëve të tij, ndërsa një qëndrim i ngjashëm është përcjellë edhe nga Rama te bashkëpunëtorët në Komunë.
Në ditët në vijim priten lëvizje në administratën komunale, përfshirë ndryshime në drejtoritë, largime ose rotacione të zyrtarëve të afërt me Abdixhikun, si dhe rishikim të pozitës së nënkryetarit. Në fokus mbetet edhe Drejtoria e Investimeve Kapitale, për të cilën pritet ndryshim në mënyrën e drejtimit.
Zhvillimet ndodhin në një periudhë të ndjeshme politike, në prag të mundshëm të një cikli të ri zgjedhor. Përplasja pritet të ndikojë në pozicionin e LDK-së në kryeqytet dhe më gjerë.
Tensione mes Abdixhikut dhe Ramës janë shfaqur edhe më herët. Një rast lidhej me një billboard në hyrje të Veternikut, i cili ishte larguar për një periudhë me vendim të Ramës dhe kishte shkaktuar pakënaqësi.
Mbetet e paqartë nëse palët do të arrijnë marrëveshje apo nëse përplasja do të thellohet në ditët në vijim.
Lini një Përgjigje