FLASH
Shkruar nga Pamfleti
Partitë parlamentare paraqesin qëndrime të ndryshme për epilogun e çështjes dhe hapat që pasojnë
Gjykata Kushtetuese pritet të marrë vendimin përfundimtar për dekretin e presidentes Vjosa Osmani për shpërndarjen e Kuvendit, ndërsa përfaqësues të partive kryesore parlamentare kanë bërë publike pritshmëritë e tyre.
Deputeti i LVV-së, Vigan Qorrolli, tha në Debat Plus se partia e tij pret që Gjykata ta vlerësojë dekretin si të pavlefshëm dhe antikushtetues. Sipas tij, një vendim i tillë do t’i hapte rrugë një procedure të re për zgjedhjen e presidentit nga Kuvendi.
Në të njëjtën linjë debati, deputeti i PDK-së, Përparim Gruda, tha se Kuvendi aktual ka humbur legjitimitetin dhe se zgjidhja duhet kërkuar përmes zgjedhjeve të reja. Ai u shpreh se pret që aktgjykimi i Gjykatës të sqarojë procesin e zgjedhjes së presidentit, por theksoi se vendi duhet t’u drejtohet qytetarëve përmes votës.
Ndërkohë, deputeti i LDK-së, Ermal Sadiku, kërkoi që dekreti i presidentes të marrë vlerësimin që i takon dhe që procesi të çojë në shpërndarjen e Kuvendit. Ai tha se pret që vendi të shkojë në zgjedhje brenda afatit kushtetues prej 45 ditësh.
Qëndrimet e tri partive tregojnë se vendimi i Gjykatës Kushtetuese mbetet përcaktues për rrjedhën e mëtejshme institucionale dhe politike në vend.
Lini një Përgjigje