FLASH
Shkruar nga Pamfleti
Ky vit ka nisur me katër atentate dhe vrasje, teksa vetëm ditën e sotme u regjistruan dy shpërthime me eksploziv në Shkodër dhe Krujë, ndërkohë që ministri prezanton anketime e rezultate siç i intersojnë qeverisë para zgjedhjeve.
Ditën e sotme Ministria e Brendshme prezantoi një anketimin financuar nga qeveria suedeze për matjen e perceptimit qytetar mbi nivelin e sigurisë në vendin tonë dhe besimit tek Policia e Shtetit.
Ky anketim sipas ministrit Ervin Hoxha është tërësisht i pavarur, kryhet për të gjashtën herë me iniciativën dhe nën mbikëqyrjen e qeverisë suedeze.
Ai tha se nga anketimi rezulton se 82% e qytetarëve ndihen të sigurtë dhe 65% e vlerësojnë punën e policisë si të mirë dhe shumë të mirë.
"Ndajmë me ju sot një histori suksesi, të një institucioni që ka një shtyllë të fortë të sigurisë dhe besimit në rritje për shoqërinë shqiptare. Policia e Shtetit ka bërë hapa të mëdhenj drejt një të ardhmeje më të sigurt. Në dekadën e fundit, perceptimi i publikut është transformuar ndjeshëm. Rezultat i punës së palodhur, përfshirë modernizimin e Policisë së Shtetit, transparencën në çdo vendimmarje në kohë reale, përgjegjësinë ndaj komunitetit, bashkëpunimi me qytetarët dhe institucionet e tjera ligjzbatuese sepse siguria është detyra jonë parësore. 67% e qytetarëve kanë deklaruar se trajtohen me respekt dhe dinjitet nga Policia. 82% e qytetarëve ndihen më të sigurt në zonat ku banojnë.“, tha ministri.
Ndërkohë ju sjellim në vëmendje shifrat se e sigurtë është Shqipëria përtej rezultateve të prezantuar nga ministri Hoxha. Ky vit ka nisur me katër atentate dhe vrasje, teksa vetëm ditën e sotme u regjistruan dy shpërthime me eksploziv në Shkodër dhe Krujë.
2025 ndërkohë ka rikthyer modelin e vrasjeve mafioze në vend. Teksa jemi në ditën e fundit të Janarit të vitit janë regjistruar të paktën 4 atentate, nga të cilat dy prej tyre kanë mbetur ende të pazbardhura për shkak të profesionalizmit të treguar nga autorët.
Atentatet e 2025:
Vrasja e Ramzan Mataj, Shkodër
I pari ndodhi më datë 4 janar, ku Ramzan Mataj 33-vjeç, u qëllua me breshëri plumbash brenda makinës së tij tip “Benz” në fshatin Dragoç të Shkodrës dhe më pas u gjet nga kalimtarët e rastit, më datë 5 janar.
Nga hetimet e u zbulua se Ramazan Mataj kishte një lidhje të gjatë dashurie me një vajzë të fshatit Dragoç në Postribë të Shkodrës, dashuri e ndaluar kjo, pasi familja e kishte martuar të renë, 2 herë. Martesat dyshohet se janë prishur pikërisht prej historisë që të rinjtë nuk e ndalën, dhe që nuk u kalua lehtë nga vëllai i madh i vajzës, i cili siç tregoi në një rast i kishte parë bashkë.
Me këtë mllef të mbledhur, ndikuar nga mentaliteti dhe rrethi miqësor dhe me motrën të dëbuar nga familja, Arjon Hasaj 29 vjeç thuri planin për të vrarë 33-vjeçarin Ramazan Mataj, bashkëfshatarin e tij.
I vëllai hapi një profil fals në rrjetet sociale, dhe u shtir të ishte një vajzë që kishte ardhur në fshat tek tezja e saj. Me këtë skenar e ftoi në një takim të riun, aty ku edhe e vrau me breshëri kallashnikovi brenda makinës mbrëmjen e së shtunës.
Pas dhjetëra të shoqëruarve, përfshirë edhe banorë që me dëshmitë e tyre ndihmuan hetuesit, policia arre
Vrasja e biznesmenit Bujar Nasufi, Tiranë
Atentati i dytë ndodhi në kryeqytet dhe shumë më i sofistikuar se ai në Shkodër. Më datë 12 janar, biznesmeni Bujar Nasufi, u qëllua me breshëri plumbash në automjet, pranë hyrjes së banesës së tij në zonën e “Pallatit me Shigjeta”.
Në momentin e atentatit Nasufi ndodhej në mjet së bashku me bashkëshorten e tij që ka parë të gjithë skenën. Autori i maskuar si shpërndarës picash i është afruar me një motor makinës së viktimës dhe ka zbrazur armën ndaj këtij të fundit duke e plagosur rëndë. 56-vjeçarri më pas ndërroi jetë rrugës për në Spital. Autori nga ana tjetër duke përftuar nga nata, është arratisur me motorin e tij në drejtim të zonës së Selitës.
Një ditë më vonë në një repart të braktisur të ushtrisë u gjet i djegur motori dhe arma e krimit. Motori rezultoi të ishte pa targe dhe numër identifikimi. Kjo gjë e ka vështirësuar punën e hetuesve të cilët ende nuk kanë një pistë mbi rastin. Familjarët e Nasufit janë marrë në pyetje për të treguar nëse kanë pasur konflikte të mëparshme por një gjë e tillë është hedhur poshtë prej tyre.
Vrasja e Kristjan Markut, Vlorë
Atentati i tretë ndodhi në aksin Fier-Vlorë, pranë fshatit Novoselë një ditë pas atij në Tiranë. Mbrëmjen e djeshme më datë 13 janar, Kristjan Marku u ekzekutua me breshëri plumbash teksa lëvizte me mjetin e tij në drejtim të Vlorës.
Sipas hetimeve, 30-vjeçari u ndoq dhe u qëllua për rreth 400 metra. Tre plumba mësohet se kapën në trup Markun, i cili nuk iu mbijetoi plagëve të marra dhe ndërroi jetë në vend. Autorët, më pas dogjën makinën në mes të autostradës Fier-Vlorë dhe më pas u arratisën me një makinë tjetër.
Për shkak të të shkuarës kriminale të 30-vjeçarit, pista kryesore mbetet ajo e hakmarrjes për shkak se fisi i Markut ndodhet në gjakmarrje me fisin Reçi në Rrëshen. Megjithatë pavarësisht kësaj, ende nuk ka asgjë konkrete.
Ajo që vlen të theksohet dhe që është vërtetë shqetësuese, është fakti se në vendin tonë është rritur numri i vrasjeve profesionale të cilat nuk arrijnë të zbardhen nga autoritetet, nga njëra anë.
Nga ana tjetër, krimi duket se nuk ka më aspak frikë të planifikojë vrasje mafioze të porositura dhe vepron i pa shqetësuar nga veriu në jug të vendit pa iu futur gjemb në këmbë.
Ajo që vihet re më së shumti në vrasjet mafioze, është fakti se në fund të çdo ekzekutimi autorët djegin makinën dhe armët, duke mos lënë asnjë gjurmë pas.
Vrasja e Lulzim Vishës në Kamëz
Mëngjesin e 24 Janarit, rreth orës 7:40, në rrugën “Shën Stefani”, në Zall Mner, është gjetur pa shenja jete brenda automjetit 48-vjeçari Lulzim Visha.
48-vjeçari i vrarë me armë zjarri në Zall Mner punonte postier dhe ishte nisur për në punë në momentin kur ka ndodhur ngjarja.
Ai është vrarë brenda automjetit të një poste private. Ngjarja është lajmëruar nga një banor i zonës, i cili ka njoftuar Policinë.
Dyshohet që 48-vjeçari të jetë nxjerrë në pritë. Në makinë janë gjetur mbi 12 gëzhoja pistolete.
Ekzistojnë dyshimet për një hasmëri të mundshme mes viktimës Lulzim Visha dhe personave të tjerë. Para disa viteve, vëllai i Lulzim Vishës ka vrarë një tjetër person./ Pamfleti
Lini një Përgjigje