FLASH
Shkruar nga Pamfleti
Projekt-rezoluta anti-korrupsion e propozuar nga kryeministri Edi Rama kalon sot në Kuvend për miratim.
Rezoluta anti-korrupsion u fut në rend dite vetëm më votat e mazhorancës gjatë mbledhjes së Konferencës së Kryetarëve, ndërsa opozita abstenoi pasi është skeptike për funksionimin e këtij mekanizmi të ri.
Kjo projekt-rezolutë synon të rrisë sundimin e ligjit, luftojë korrupsionin dhe të përafrojë legjislacionin shqiptar me atë të Bashkimit Europian.
Miratimi i kësaj rezolute në parlament kërkon një shumicë të thjeshtë votash, çka do të thotë se mazhoranca mund ta miratojë lehtësisht vetëm me votat e saj.
Pas miratimit të rezolutës mes palëve pritet të nisin diskutimet për ngritjen e një komisioni të posaçëm, që do të monitorojë punën e institucioneve, përfshirë edhe ato të drejtësisë për luftën kundër korrupsionit, të rekomandojë propozojë ndryshime ligjore në përputhje me legjislacionin e Bashkimit Europian.
Kuvendi mblidhet sot në 13:00, ndërsa pas javës së gjelbër ligjvënësit do diskutojnë edhe për problematikat e evidentuara në zonë gjatë takimeve me qytetarët.
Por argumentet e socialistëve nuk kanë bindur kryetaren e Komisionit të Integrimit Jorida Tabakun e vetmja demokrate në mbledhje e cila ka abstenuar.
“Kur duan të luftojnë korrupsionin, pse kalon një javë më parë një ligj klientelist”, tha Tabaku.
Mësohet se grupi i Sali Berishës do të votojnë kundër rezolutës për thellimin e reformave për mirëqeverisjen dhe luftën kundër korrupsionit, pasi detyra e opozitës nuk është të japë këshilla për mirëqeverisjen për një mazhorancë që ata besojnë se e ka qeverisur keq vendin.
Sipas opozitës, korrupsioni po shkatërron Shqipërinë dhe nuk luftohet me rezoluta e komisione të përbashkëta.
Pak javë më parë kryeministri Edi Rama nga mbledhja e grupit parlamentar socialist lajmëroi se mazhoranca ka vendosur si prioritet luftën kundër korrupsionit. Për këtë qëllim parlamenti do të miratojë një rezolutë e më pas një komisioni i posaçëm parlamentar do të rishikojë të gjithë kuadrin ligjor që lidhet me luftën kundër korrupsionit dhe mirëqeverisjen; kur përfshihet edhe reforma në drejtësi.
Lini një Përgjigje