FLASH
Shkruar nga Pamfleti
Kreu i opozitës, Sali Berisha ka akuzuar drejtpërdrejt kryeministrin Edi Rama për politikën fiskale mbi naftën dhe për situatën e negociatave me Bashkimin Europian.
Në një videomesazh të publikuar në profilin e tij në “Facebook”, në ditën e Pashkëve, Sali Berisha akuzoi qeverinë për taksa rekord mbi karburantin dhe për bllokim të procesit të integrimit europian për shkak të aferave të brendshme.
Berisha deklaroi se qeveria aplikon nivelin më të lartë të taksimit mbi naftën, duke pretenduar se 60% e çmimit përbëhet nga taksa dhe se shteti përfiton rreth 1.1 euro për litër. Ai e cilësoi ndërhyrjen e qeverisë në akcizë si të pavlefshme, duke theksuar se mekanizmi hyn në fuqi vetëm mbi nivelin 220 lekë për litër.
Në të njëjtën deklaratë, ai lidhi çmimin e karburantit me efekt zinxhir në ekonomi, duke përmendur fermerët dhe rritjen e çmimeve të tjera. Sipas tij, ulja e barrës fiskale mbetet e vetmja rrugë për stabilizimin e tregut. Në planin politik, Berisha akuzoi qeverinë për bllokim të raportit IBAR dhe, sipas tij, të procesit të negociatave me BE. Ai kundërshtoi pretendimin se opozita ka ndikuar në këtë proces dhe deklaroi se numri i vendeve që kanë bllokuar raportin është rritur nga katër në nëntë, duke e lidhur këtë zhvillim me mosbesimin ndaj qeverisë.
“Mirëdita! Së pari, të dashur qytetarë dhe qytetare, ju uroj dhe njëherë nga zemra gëzuar Pashkën, Pashkën tjetër më mirë ta festojmë. Së dyti, jam sot para jush sepse nuk ngurroi as ditën e Pashkës të ligjërojë monologun e tij të mashtrimit. Edi Rama sot u rrek përsëri të mashtrojë shqiptarët lidhur me çmimin stratosferik të naftës. E vërteta dhe njëherë ta dini të dashur qytetarë, se kjo qeveri ka vendosur mbi naftën, taksën absolutisht më të lartë në botë. Kjo qeveri takson si asnjë qeveri tjetër e planetit, 60% të çmimit me të cilin shitet nafta në treg dhe merr në çdo litër naftë 1.1 euro.
Lëvizja që pretendon me akcizën, është një tallje. Sipas tij, ajo hyn në fuqi kur nafta tejkalon 220 Iekë për litër, ndërkohë që përgjysmimi i barrës fiskale, i taksave mbi naftën, do të ishte rruga e vetme për të ulur çmimin e saj dhe për ta mbajtur atë në nivele të përballueshme nga qytetarët shqiptarë, nga fermerët shqiptarë, për ta mbajtur atë në nivele të kontrollueshme edhe për çmimet e tjera. Së dyti, përsëri, ai fajësoi për bllokimin e raportit të IBAR, de facto të negociatave me Bashkimin Europian, për shkak të çështjes Balluku dhe AKSHI, ku autor kryesor është Edi Rama, që përdori 83 mandatet e krimit për të mbrojtur veten nga dosja Balluku. Së pari u përpoq të fajësojë opozitën. Së dyti, hodhi poshtë, mashtroi, se ka një bllokim apo ka një mosvotim të raportit të IBAR. E vërteta është kjo të dashur qytetarë: Opozita nuk është shkaku i bllokimit të votimit të raportit IBAR. Shkaku i vërtetë është vota me 83 mandate krimi, mburojë e korrupsionit të Edi Ramës, Lub Ballukut dhe rrethit të tij familjar dhe zyrtar.
Dhe unë ju garantoj, se ky bllokim do bëhet gjithnjë e më i fortë. Mos harrojmë se para 3 javësh ishin 4 vende, ato të cilat bllokuan votimin e raportit IBAR. Me datën 1 prill, nuk ishin më 4 vende, por ishin 9 vende, një pjesë e mirë e të cilave janë pro zgjerimit të Bashkimit Europian. Pra, edhe njëherë, me Edi Ramën, integrim nuk ka. Edi Rama është një armik i egër, i cili, po zëvendëson integrimin e vërtetë në Bashkimin Europian, me integrimin e tij me Beogradin. Po zëvendëson pasaportën evropiane, me pasaportën e Serbisë. Së fundmi, foli dhe për fermerët, të cilët janë në një rënie të lirë dhe falimentim të papërmbajtshëm, të pandalshëm. E gjithë skema, i gjithë qëndrimi i kësaj qeverie ndaj fermerëve, si në sistemin fiskal, ashtu edhe në subvencionet, dhe tani së fundi në çmimin stratosferik të naftës, është një praktikë kryekëput falimentimi. Data 17 prill, është dita që çdo qytetar duhet të dëshmojë zemërimin e tij, revoltën e tij, ndaj kësaj qeverie, e cila po bën gjithçka për të mbijetuar, që të vjedhë, të plaçkisë, edhe më shumë shqiptarët”, shprehet Berisha në mesazhin e tij.
Lini një Përgjigje