FLASH
Shkruar nga Pamfleti
E Ngarkuara me Punë e Ambasadës së Shteteve të Bashkuara të Amerikës në Shqipëri, Nancy VanHorn, ka zhvilluar një takim me trupën e gjyqtarëve të Gjykatës Kushtetuese.
Ky takim vjen në një kohë kur ka një krizë në raportin mes Parlamentit dhe Gjykatës Kushtetuese për shkak të mandatit të deputetes Olta Xhaçka. Duket se e dërguara e SHBA u ka dhënë mbështetje gjyqtarëve.
Kujtojmë se Komisioni i Venecias ka pranuar kërkesën e Kuvendit të Republikës së Shqipërisë drejtuar Presidentes së këtij Komisioni për mandatin e deputetes socialiste, Olta Xhaçka. Nëpërmjet saj, kërkohet opinion lidhur me raportin midis demokracisë përfaqësuese parlamentare dhe detyrimit për zbatimin e vendimeve të Gjykatës Kushtetuese.
Në përgjigjen e saj, Presidentja e Komisionit të Venecias, znj. Claire Bazy Malaurie, informon se kjo çështje është vendosur për shqyrtim në mbledhjen e Komisionit të datës 6-7 Dhjetor 2024.
Mazhoranca abstenoi gjatë votimit në Kuvend për mandatin e koleges së tyre, duke mos e bërë të mundur në këtë mënyrë dërgimin e çështjes në Gjykatën Kushtetuese, siç kjo e fundit kishte urdhëruar.
Heqjen e mandatit të deputetes Xhaçka e ka kërkuar Partia Demokratike.
VanHorn, e shoqëruar nga Mary Kate Butterfield dhe David Backman, këshilltarë ligjorë rezidentë në Ambasadë, është takuar me Kryetaren e kësaj Gjykate, Holta Zaçaj, dhe gjyqtarë të tjerë.
Gjatë takimit, Zaçaj përmendi disa nga hapat e ndërmarrë në lidhje me transparencën dhe informimin e publikut për veprimtarinë e institucionit të Gjykatës Kushtetuese. Ajo ka theksuar rolin e rëndësishëm që luan Gjykata Kushtetuese, si një prej institucioneve më të larta në hierarkinë shtetërore.
Reagimi i Gjykatës Kushtetuese:
Trupa e gjyqtarëve të Gjykatës Kushtetuese, e kryesuar nga Kryetarja e kësaj Gjykate, znj. Holta Zaçaj, ka zhvilluar sot, në datën 01.10.2024, një takim me të Ngarkuarën me Punë të Ambasadës së Shteteve të Bashkuara të Amerikës në Shqipëri, zonjën Nancy VanHorn, e cila shoqërohej në këtë takim nga znj. Mary Kate Butterfield dhe z. David Backman, këshilltarë ligjorë rezidentë në Ambasadë.
Gjatë takimit, Kryetarja Zaçaj përmendi disa prej hapave të ndërmarrë në lidhje me transparencën dhe informimin e publikut për veprimtarinë e institucionit të Gjykatës Kushtetuese, me qëllim jo vetëm rritjen e reputacionit dhe kredibilitetit të këtij institucioni, por edhe bërjen të kuptueshme nga publiku i gjerë të vendimeve të saj. Gjatë kësaj periudhe janë miratuar Rregullorja e Marrëdhënieve të Gjykatës Kushtetuese me Median, është bërë kreditimi i gazetarëve që ndjekin veprimtarinë e Gjykatës duke organizuar edhe konferenca interaktive për shtyp, si dhe ndjekja në Live Stream e seancave gjyqësore publike.
Në vijim, duke theksuar rolin e rëndësishëm që luan Gjykata Kushtetuese, si një prej institucioneve më të larta në hierarkinë shtetërore, si dhe rëndësinë që mbart paanshmëria dhe integriteti i gjyqtarëve në përmbushjen si duhet të misionit të saj Kushtetues, palët në takim shprehën angazhimin për gjetjen e mekanizmave të mbështetjes dhe bashkëpunimit për rritjen e kapaciteteve dhe përmirësimin e infrastrukturës, në funksion të rritjes së pavarësisë institucionale, garantimit të mbrojtjes së të drejtave dhe lirive themelore të individit, forcimit të demokracisë dhe shtetit të së drejtës.
Lini një Përgjigje