FLASH
Shkruar nga Pamfleti
Partia Demokratike, përmes kreut të Grupit Parlamentar, Gazment Bardhi, ka insistuar në zhvillimin e mocionit me debat në Kuvend lidhur me programin e qeverisë, e veçanërisht në fushën e integrimit të Shqipërisë në Bashkimin Evropian.
Kjo kërkesë është shqyrtuar gjatë mbledhjes së Konferencës së Kryetarëve, por është refuzuar nga mazhoranca.
Bardhi theksoi se kërkesa e Grupi Parlamentar të PD-së për zhvillimin e mocionit me debat është plotësisht e ligjshme dhe e përputhshme me rregulloren e Kuvendit.
“Nuk është caktuar seanca për këtë të enjte, dhe kërkojmë që ky mocion të zhvillohet pikërisht këtë ditë,” tha ai, duke shtuar se ky debat është një mundësi e rëndësishme për të diskutuar aspiratën e Shqipërisë për anëtarësimin në Bashkimin Evropian.
Bardhi e akuzoi mazhorancën se po shmang debatin dhe transparencën lidhur me politikën e integrimit evropian.
“Mazhoranca i shmanget debatit dhe transparencës për qeverinë, duke refuzuar kërkesën për mocion,” theksoi ai, duke kërkuar që Konferenca e Kryetarëve të vendosë menjëherë për zhvillimin e këtij mocioni.
Duke iu drejtuar mazhorancës, Bardhi tha se “keni qenë ju që keni bërtitur në Kuvend se opozita nuk do debat. Sot jeni ju që po e faktoni se kush nuk do debat, kush nuk ka një bilanc për t’u përballur në debat, kush nuk ka një program të qartë për atë që e keni shpallur si prioritet, pra anëtarësimin në BE.”
Ai e cilësoi këtë refuzim të mocionit si një shenjë të frikës nga përballja me opozitën dhe mungesës së një bilanci konkret për realizimin e premtimeve.
“Bilanci i vetëm i qeverisë është ku do të udhëtojnë për takime, kujt do t’i japin leje ndërtimi, cili është koncesioni i radhës apo cilat para do të vidhen”, tha kreu i grupit të PD-së.
Ai shtoi se këto janë prioritetet e qeverisë dhe jo procesi i integrimit evropian, për të cilin mazhoranca nuk ka një plan të qartë.
Lini një Përgjigje