FLASH
Shkruar nga Pamfleti
Paranoja e autoritarëve…
Ky mjeti i lundrueshëm që duket në foto është një skaf i Policisë Kufitare të Vlorës. Që ka qëndruar gjithë fundjavën e shkuar në ujrat përballë rezidencës qeveritare. Arsyeja?
Atje kishte ardhur i madhi fare, Edi Rama, për të punuar e pushuar. Fotoja është kapur në momentin, kur një turist i huaj, që ndodhej në territorin e një strukture luksoze në Ujin e Ftohtë, po notonte për qejfin e tij.
Por notari evropian, i cili ishte në një moshë të madhe, ju afrua ujrave të Bablokut, dhe menjëherë atje mbërriti ‘sa hap e mbyll sytë’ motoskafi i policisë kufitare.
Një polic doli në kuvertë dhe i bërtiti notarit të largohej direkt se ishte e ndaluar të lahej në ujërat e të madhit.
Duket se jemi në situatën e një paranoje të çmendur nga ana e Bablokut, pasi alarmi ka qenë aq i madh, sa policia kufitare ka mbërritur me shpejtësi nga zona e patrullimit për të bërë rikonjicion.
Përveç paranojës, mund të jemi edhe në kufirin e një sëmundje të ngjashme tek autoritarët, sa nuk duan njerëz të zakonshëm aty ku është zona e tyre e kuqe. Po gjithsesi, edhe kjo mbetet paranojë.
E si pasojë e saj, mjeti lundrues i policisë kufitare nuk ka lëvizur për orë e orë nga zona, për të mos lënë më asnjë notar që të kalojë ”klonin”.
Në kohën e Enverit të paktën, zona deri në thellësi ishte e rrethuar me tela e shkruhej qartësisht: Zonë ushtarake, rreptësisht e ndaluar! Njerëzit e dinin mirë se nuk mund të afroheshin.
Po kjo logjika që Rama bën si lider popullor e pastaj kur populli i shkon afër, thërret Taulantin; ky i fundit drejtorin e Vlorës, e drejtori shefin e vogël, e shefi i vogël mjetin lundrues, është shumë stresuese për të fundit fare, që i takon të rrezikojë jetën duke ecur me shpejtësi marramendëse, ngaqë shefi i madh është pak i stresuar.
Nuk mjafton që rezidencat qeveritare ku pushon Babloku kanë zënë zonat më të mira bregdetare në vend, nuk mjafton që u ka dhënë oligarkëve pjesën më të virgjër të rivierës, nuk mjafton që ka licencuar të gjithë të tmerrshmit e vendit, por tashmë po sanksionon edhe detin.
Ka zona ku mund të lahesh, e zona që nuk mund të lahesh. Po pse nuk mbajtëm Enverin? Të paktën ai të lajmëronte përpara!/Pamfleti
Lini një Përgjigje