FLASH
Shkruar nga Pamfleti
Ministri i Brendshëm, Taulant Balla ka zhvilluar një takim me strukturat drejtuese të Policisë së Durrësit, teksa nuk ka nguruar të bëjë rolin e mentorit duke këshilluar efektivët se si të sillen me qytetarët.
Balla kërkoi që kryesisht punonjësit e Qarkullimit Rrugor të kenë etikë dhe ndëshkimi i shoferëve të mos jetë qëllim në punën e tyre. Më tej, ai i ka mësuar ato sesi duhet të sillen në momentin që ndalojnë një shofer në rrugë.
"Përpara se t’i kërkoni dokumentet, është detyrim të përshëndeteni me qytetarin, pyetni çfarë halli ka që e shtyjnë të shkelë rregullat e qarkullimit rrugor, duke rrezikuar veten e të tjerët", i mëson Balla efektivëve të Rrugores.
Balla gjithashtu iu shpjegon policëve se nuk janë "gjahtarë shkelësish" dhe se gjoba të mos jetë qëllimi i ndalimeve.
“Policia Rrugore nuk është gjahtare shkelësish. Nëse një drejtues automjeti nuk ka të vendosur rripin apo përdor telefonin e lëvizshëm gjatë drejtimit, përpara se t’i kërkoni dokumentet, është detyrim të përshëndeteni me qytetarin, pyetni çfarë halli ka që e shtyjnë të shkelë rregullat e qarkullimit rrugor, duke rrezikuar veten e të tjerët. Pra ajo që për ne ka rëndësi është siguria rrugore, është edukimi apo ndërgjegjësimi. Nuk është gjoba, qëllimi. Asnjë rast nuk është njësoj me tjetrin. Nuk më interesojnë “sukseset” e gjobave, por bindja e përgjithshme e qytetarëve se duhen zbatuar rregullat, jo pse është një punonjës i policisë rrugore pas kthesës, por sepse kështu mbrojmë jetë njerëzore.
Durrësi është qyteti me flukset më të larta të pushuesve vendas e të huaj, e për këtë Policia e Shtetit në koordinim me strukturat e tjera shtetërore kanë përgjegjësi kyçe për sigurinë në vijën bregdetare. Lufta kundër kultivimit të narkotikëve mbetet një tjetër prioritet", tha Balla.
Lini një Përgjigje