FLASH
Shkruar nga Pamfleti
Mediat amerikane i kanë bërë jehonë dënimit të Charles McGonigal për dosjen shqiptare. Ai u dënua me 2 vite e gjysmë burg një ditë më parë dhe thuajse të gjitha mediat e rëndësishme e kanë pasqyruar, duke vënë theksin te takimet me kryeministrin Rama. Rrjeti amerikan “CBS News” ka bërë një artikull të gjatë, ku përmend dhe se si McGonigal nxiti nisjen e hetimeve mbi lobimet e Bashës me dyshimet për para ruse.
Charles McGonigal, ish-zyrtari më i lartë i kundërzbulimit në zyrën e FBI-së në Nju Jork, u dënua me më shumë se 2-vite burg të premten, për fshehjen e të paktën 225,000 dollarëve cash që kishte marrë nga një ish-oficer i inteligjencës shqiptare.
Në këmbim të pranimit të fajësisë së tij, u hoqën akuzat në lidhje me fshehjen nga ana e McGonigal të udhëtimeve jashtë shtetit për t'u takuar me zyrtarë të qeverisë shqiptare dhe biznesmenë, ndërsa ishte i punësuar nga FBI.
McGonigal do të vuajë 6.5 vite burg, pasi është i dënuar dhe për çështjen ruse. Në dhjetor, McGonigal u dënua në Nju Jork me më shumë se 4-vite burg për lidhjet me një oligark rus të sanksionuar dhe aleat të ngushtë të presidentit rus, Vladimir Putin.
"Z. McGonigal duket se ka humbur busullën e tij morale", tha të premten gjyqtarja, Colleen Kollar-Kotelly. "Motivimi i tij ishte vetëm lakmia dhe sinqerisht arroganca", shtoi ajo.
Prokurorët në Uashington argumentuan se veprimet e McGonigal "sugjerojnë se ai ishte kompromentuar" dhe pretendimet se po mendonte pensionimin "nuk ishin motivimi i tij i vetëm".
FBI u detyrua gjithashtu të rishikonte dosjet që ai kishte hetuar, pasi ka pasur dyshime për kompromentim.
"I pandehuri ka punuar në disa nga çështjet më të ndjeshme dhe të rëndësishme të trajtuara nga FBI. Mungesa e tij e besueshmërisë, siç zbulohet nga sjellja e tij në bazë të veprës së tij të dënimit, mund t'i rrezikojë të gjitha. Nga hetimi i brendshëm rezultoi se ka pasur një angazhim të madh, që kërkon një shpenzim të panevojshëm të burimeve të konsiderueshme qeveritare", thanë prokurorët.
Prokurorja Elizabeth Aloi theksoi se McGonigal "shiti distinktivin e tij".
Fillimi i telasheve të McGonigal
McGonigal kaloi më shumë se dy dekada në FBI, duke punuar në disa nga çështjet kryesore të sigurisë kombëtare, nga ndalimi i një komploti për të bombarduar metronë e qytetit të Nju Jorkut e deri te publikimi i një grumbulli dokumentesh të klasifikuara nga WikiLeaks. Ai u ngrit në gradat për t'u bërë shefi i kundërzbulimit në Nju Jork, përpara se të tërhiqej në vitin 2018.
Rënia e tij filloi në vitin 2017, teksa përgatitej për pension, sipas dokumenteve të gjykatës.
McGonigal i kërkoi ish-oficerit të inteligjencës shqiptare, i cili ishte bërë shtetas amerikan i natyralizuar, një ‘hua’, ndërsa diskutonin për mundësitë e biznesit. Huaja nuk u shlye kurrë. Të dy udhëtuan drejt Shqipërisë dhe vendeve të tjera, ku McGonigal kishte interesa biznesi dhe u takua me shtetas të huaj në disa raste.
Në një nga ato udhëtime, McGonigal u takua me kryeministrin e Shqipërisë për ta paralajmëruar kundër dhënies së licencave fitimprurëse të shpimit të naftës për kompanitë ruse - një çështje në të cilën ish-oficeri i inteligjencës kishte një interes financiar. Në shenjë vlerësimi, McGonigal i dha kryeministrit një kapelë të FBI-së.
Më pas ai udhëtoi në Kosovë me "qëllim të dyfishtë për të mbledhur informacion që ishte potencialisht i dobishëm për FBI" dhe "planin e zhvillimit të biznesit personal të pazbuluar", thanë prokurorët. Gjatë atij udhëtimi, ai i dha një kapelë po të FBI-së një politikani në Kosovë.
Rreth një muaj më vonë, në një makinë të parkuar jashtë një restoranti në Nju Jork, ish-oficeri i inteligjencës i dorëzoi McGonigal-it rreth 80,000 dollarë para të gatshme si pjesë e huasë që ai kishte kërkuar. Në vitin 2017, ai i dha McGonigal dy pagesa të tjera në shtëpinë e tij në New Jersey.
Me nxitjen e McGonigal, byroja hapi një hetim për një lobist amerikan që punonte për një kundërshtar politik të kryeministrit shqiptar, në të cilin ish-oficeri i inteligjencës shërbeu si burim i FBI-së. Hetimi u mbyll menjëherë pasi McGonigal doli në pension, "sepse akuzat nuk u vërtetuan kurrë", thanë prokurorët. (Rasti i Bashës)
Akuzat ndaj McGonigal në çështjen e Nju Jorkut lidheshin edhe me fshehjen e pagesave. McGonigal pranoi se ndihmoi oligarkun Oleg Deripaska të gërmonte mbi një oligark rival rus dhe të pastronte paratë duke fshehur burimin e pagesave për atë punë. Veprimi ishte në kundërshtim me sanksionet amerikane të vendosura ndaj Deripaska në vitin 2018.
McGonigal kërkoi mëshirë në gjykatë të premten, duke i thënë gjykatësit se kishte një "ndjenjë të thellë pendimi dhe pikëllimi" për krimet e bëra.
“Po ju kërkoj me përulësi një shans të dytë”, tha ai, duke i kërkuar falje bashkëshortess së tij, dy fëmijëve të tyre dhe ish-kolegëve të tij të FBI-së.
Bahskëshortja e tij, Pamela, në një letër drejtuar gjykatësve federalë në Uashington dhe Nju Jork përpara dënimit të tij, tha se McGonigal "ishte ambicioz dhe po kërkonte të siguronte një jetë të mirë" për familjen e tij pas daljes në pension.
"Unë besoj se kjo ambicie e çoi në rrugë të gabuar dhe e bëri atë të humbasë fokusin në realitetin e vendimmarrjes dhe veprimeve të tij", shkroi ajo.
McGonigal do të fillojë të vuajë dënimin e tij me burg më 18 mars. /Përshtati “Pamfleti” nga “CBS News”
Lini një Përgjigje