FLASH
Shkruar nga Pamfleti
Komisioni i Ankimeve dhe Sanksioneve vendosi këtë të mërkurë rrëzimin e kërkesës së grupit të Sali Berishës, duke njohur si kryetar të PD-së zyrtare Lulzim Bashën.
KAS la kështu në fuqi vendimin e datës 4 shtator të Komisionerit Ilirjan Celibashi, i cili regjistroi Partinë Demokratike me kryetar Lulzim Bashën për zgjedhjet e pjesshme të 24 shtatorit.
Pavarësisht pretendimeve të përfaqësuesit ligjor të Rithemelimit për regjistrimin e Partisë Demokratike me kryetar Sali Berishën, Celibashi njoftoi se Gjykata e Tiranës njeh për kryetar Bashën.
Ai sqaroi edhe njëherë se në regjistrin e partive ekziston vetëm një PD, ku Lulzim Basha dhe mbështetësit e tij janë ata që disponojnë vulën dhe logon.
Dje grupi i Berishës dërgoi në KQZ kërkesën për t’u regjistruar.
Kandidati Emri Vata i dalë nga “Primaret” e Berishës do të regjistrohet dhe garojë si në 14 Maj nën siglën e koalicionit “Bashkë Fitojmë” me partinë e Ilir Metës.
Për zgjedhjet e Kukësit, Partia Socialiste kandidon me Prefektin e Qarkut, Albert Halilaj, koalicioni Bashkë Fitojmë kandidon me Emri Vatën, ndërsa PD zyrtare, e drejtuar nga Basha, nuk ka caktuar ende asnjë kandidat.
Për këto zgjedhje forcat politike kanë pasur afat deri me datë 1 shtator për t'u regjistruar në KQZ si subjekte zgjedhore, ndërsa kandidatët jo më vonë se data 8 shtator.
Tashmë siç dihet opozita do të shkojë e përçarë edhe në zgjedhjet e pjesshme për Bashkinë e Kukësit, duke e ndarë votën mes dy kandidatëve.
Zgjedhjet e pjesshme do të mbahen pasi Safet Gjici dha dorëheqjen për shkak të video-skandalit seksual, të filmuar në zyrën e tij.
Në krahun tjetër, grupi i Berishës mori një fitore të vogël sot nga KAS-i, që rrëzoi kërkesën e Bashës duke i dhënë të drejtën koalicionit “Bashkë Fitojmë” dy komisionerë dhe PD-së zyrtare vetëm një, pasi në 14 Maj doli forcë e tretë.
Lini një Përgjigje