FLASH
Shkruar nga Pamfleti
Kryetari i Kuvendit Niko Peleshi, ka reaguar pas seancës plenare kaotike të zhvilluar sot dhe përplasjes së opozitës me Gardën.
Ai shprehet se Institucionet e Republikës janë vlerë e përbashkët, jo arena për beteja personale apo partiake, ndërsa falenderon Gardën për korrektesën dhe përgjegjësinë në kryerjen e detyrës.
Peleshi shkruan se çdo sjellje që shkel etikën, cenon përfaqësimin dhe besimin e qytetarëve. Madje, ai thekson se asnjë forcë politike nuk mund të pretendojë se përfaqëson e vetme të vërtetën.
“Kuvendi i Shqipërisë nuk është thjesht një vend debatesh, por institucioni ku fjala dhe sjelljet e deputetëve duhet të mbajnë e dëshmojnë peshën e përgjegjësisë dhe t’u shërbejnë mirëkuptimit, jo përçarjes. Çdo sjellje që shkel etikën, respektin dhe rregullat e funksionimit të Kuvendit dëmton rëndë dinjitetin, cenon përfaqësimin dhe besimin e qytetarëve. Detyrimi ynë është të bashkëpunojmë për zgjidhje në të mirë të vendit, të zhvillojmë dialog serioz, jo të krijojmë kaos.
Mbi interesin politik qëndron interesi i shtetit. Asnjë forcë politike nuk mund të pretendojë se përfaqëson e vetme të vërtetën dhe asnjë ndarje partiake nuk duhet të na bëjë të harrojmë se të gjithë shërbejmë për të njëjtin vend dhe për të njëjtët qytetarë. Institucionet e Republikës janë vlerë e përbashkët, jo arena për beteja personale apo partiake. Ruajtja, forcimi dhe respektimi i tyre është përgjegjësi që na bashkon përtej ndarjeve tona politike. Vetëm kur e vëmë shtetin mbi partinë, mund të ndërtojmë një Shqipëri më të fortë për brezat që vijnë. Respekti për Kuvendin është respekt për Republikën, respekt për qytetarët.
Mirënjohje për punonjësit e Gardës së Republikës dhe të shërbimeve të Kuvendit, për korrektesën dhe përgjegjësinë në kryerjen e detyrës”, shkruan Peleshi në “Facebook”.
Lini një Përgjigje