FLASH
Shkruar nga Pamfleti
Lulzim Basha i ka quajtur imagjinare akuzat e ish-kryeministrit Sali Berisha pas humbjes së gjyqit për heqjen e “Non gratës” nga Britania e Madhe.
Me anë të një postimi në rrjetin social “Facebook”, Basha deklaroi se ky vendim i Britanisë, faktoi se vendimi i Apelit për vulën ishte çështje pazari mes Ramës dhe Berishës.
Më tej Basha akuzoi Berishën se luftoi aq fortë për të rrëmbyer vulën e PD-së, për t’i përdorur mës pas demokratët si mburojë, për të mbrojtur veten dhe familjen e tij. Sipas ish-kreut të PD-së, Berisha dhe Rama janë në një pakt të fshehtë për të ruajtur këto balanca pushteti që kemi sot.
Postimi i plotë i Bashës:
Në vend që të sqarojë demokratët për pengimin që po i bën opozitës për interesa thellësisht personale, Berisha ngre pretendime imagjinare ndaj meje pas humbjes së gjyqit për heqjen e “Non gratës” nga Britania e Madhe.
Për çdo shqiptar sot është e qartë, dhe u faktua edhe me vendimin e paligjshëm për Partinë Demokratike, se Sali Berisha është në të njëjtin pazar me Edi Ramën, siç ishte me ndryshimet kushtetuese të 2008-ës.
Sali Berishës i duhet vula për të përdorur demokratët si mburojë për hallet e tij dhe familjes së tij; Edi Ramës pushteti për t’u mbrojtur nga i njëjti fat si paraardhësi i tij.
Përrallave të Sali Berishës u ka dalë boja prej tre vitesh. Përmes tyre mban peng Partinë Demokratike për hallin e tij personal, duke vazhduar pazarin e vjetër me Ramën, për të mbajtur status quo-në. Rruga pa krye ku ka futur veten dhe demokratët është sot e vetmja arsye pse qeveria më e korruptuar në Europë qëndron në këmbë.
Pengimi i ndryshimit, pengimi i Reformës Zgjedhore, sulmet ndaj SPAK, amnistimi i të korruptuarve, pazari për vulën, janë prova të qarta të bashkëpunimit Rama-Berisha, për interesat e tyre, kundër interesave të shqiptarëve. Shqiptarët nuk meritojnë një opozitë të mbyllur në ankthin e interesave personale të një individi, i cili sot i bën fresk qeverisë vetëm për hallin e tij.
Qeveria më e korruptuar në Europë meriton të ketë përballë alternativën që u ofron shqiptarëve ndryshim. Loja hilacake mes Ramës dhe Berishës për të mbrojtur gjendjen e mjerueshme në të cilën ndodhet ekonomia, politika dhe demokracia shqiptare, duhet dhe do të marrë fund. Shqiptarët meritojnë më shumë!
Lini një Përgjigje