FLASH
Shkruar nga Pamfleti
Ish-deputeti i Partisë së Lirisë, Petrit Vasili, ka sulmuar ashpër kryeministrin Rama. Ai u shpreh se qeveria është si një “anije e fundosur” që mbahet në këmbë vetëm me kamerdare plazhi.
Vasili thekson se qeveria ka regjistruar rekorde të errëta korrupsioni dhe largimesh të zyrtarëve, ndërsa përgjegjësia e kryeministrit për kaosin në vend është e pashmangshme.
Ai paralajmëron se momenti kur “kamerdarja e Ramës” do të shpohet dhe të zhytet është afër, duke shkruar se Rama nuk mund ta mbajë më mbi supe barrën e abuzimeve dhe dështimeve të qeverisë së tij.
“Anija e fundosur dhe Rama me komardare, por që po mbytet! Anija e qeverisë së Ramës realisht është fundosur.
Rama karrigen e kryeministrit e ka kthyer në një komardare plazhi dhe mbahet me thonj derisa të vijë momenti që t'ia shpojnë dhe të zhytet e të mbytet edhe ai me të tjerët. Rekorde më të errëta se kjo qeveri nuk kanë të gjitha qeveritë e djathta dhe të majta të marra së bashku.
Z. Kryeministër, një dyzinë ministra të brendshëm të larguar si lecka, ministra të tjerë, kryetarë bashkie që nuk numërohen e kushedi sa e sa të tjerë grabitqarë të niveleve të tjera, ky është "suksesi" më i madh i Ramës.
Praktikisht, kjo qeverisje është kthyer në një anije të ndryshkur, krye krejt nga ato të lënë terësisht pas dore, ku njerëz të rastësishëm plotësojnë nevojat biologjike mbi të.
Tashmë i vetmi lajm që ka mbetur është kur do të shpohet edhe komardarja e Ramës. Sepse kambanat bien vetëm për të.
Në kaosin që ka mbërthyer vendin për shkak të anijes së ndryshkur qeverisëse ka vetëm një gjë shumë të qartë: se radha e Ramës ka ardhur dhe ai nuk e shmang dot më.
Nuk ka më pas kujt të fshihet, sepse i shiti të gjithë dhe nuk ka më ç'të shesë, përveç ca hiçave pa vlerë që kanë mbetur në qeveri.
Komardarja, që e ai e fryn me votat e coftinave në Kuvend, nuk e mban dot më peshën e fajeve dhe përgjegjësive shumë të rënda dhe tepër të mëdha.
Komardarja nuk e mban dot më Ramën, sepse një kryeministër duhet të drejtojë një anije si qeveria dhe jo një komardare plazhi, që u shërben vetëm fëmijëve që nuk dinë not.
Shpëtojeni Ramën nga komardarja në mënyrë që, ashtu siç ai vetë thotë, drejtësia të bëjë punën e vet edhe mbi të, sepse edhe kështu është shumë vonë.
Tashmë mbytja është e pashmangshme dhe komardarja nuk e mban dot më peshën e zullumit.
Rama nuk e mban dot më Ramën”, tha Vasili.
Lini një Përgjigje