FLASH
Shkruar nga Pamfleti
Edi Rama, gjatë aktivitetit për 35-vjetorin e Partisë Socialiste e Shqipërisë në Durrës, vlerësoi rolin e kësaj force politike në transformimin e Shqipërisë ndër vite.
Rama u shpreh se kjo datë nuk shërben vetëm për të kujtuar historinë e PS-së, por edhe për të reflektuar mbi kontributin e atyre që, sipas tij, i dhanë partisë dhe vendit “aq sa mundën” në periudha të vështira dhe sot të paimagjinueshme.
Teksa kujtoi vitet e kaluara, Rama tha se gjatë qeverisjes së Berishës, kundërshtarit politik i mohohej e drejta për t’u mbledhur dhe për të organizuar tubime.
“Shumë falëminderit për këtë mikpritje dhe me keqardhjen që shumë njerëz ishin jashtë, në pamundësi të hynin brenda, sepse salla ishte plotë. Besoj që në këtë përvjetor, janë shumë ata të cilët janë pjesë e kësaj historie, e këtij rrugëtimi, e këtij kremtimi, pavarësisht sesa mund të jenë në një sallë apo përreth një salle. Ky përvjetor për ne është një moment i rëndësishëm, jo thjeshtë për të kujtuar një datë, por për t’u ndalur në një stacion dhe për të vlerësuar të gjithë ata që i dhanë PS aq sa mundën, kudo ku mundën dhe siç edhe doli nga fjalët e tyre këtu, në momente të caktuara, për shumëkënd në këtë sallë, janë tërësisht të paimagjinueshme. Është e paimagjinueshme sot në këtë sallë, që të duash të mblidhesh dhe të mos të të lejojë PS që të mblidhesh”, tha mes të tjerash Rama.
Shefi i Qeverisë theksoi gjithashtu se falë punës dhe përkushtimit të PS, Shqipëria ndodhet sot me pranë se kurrë më parë me Bashkimin Europian.
Më tej kryeministri theksoi se ishte Partia Socialiste ajo që ia ‘dhuroi’ stabilitetin vendit tonë, në një kohë kur sipas tij, Shqipëria kishte më shumë se kurrë nevojë.
“Por ky ka qenë realiteti i atyre që morën kurajon ta themelojnë PS-në, sidomos në territore ku thjeshtë emri i PS, krijonte reaksion negativ. Megjithatë, sot ia vlen të ndalemi në stacion, për faktin se gjatë gjithë këtyre viteve, në një mënyrë apo një tjetër, rrugëtimi i Shqipërisë u njëhsua me rrugëtimin e PS. Dhe ky është fakt. Sepse nëse Shqipëria sot është një Shqipëri tjetër, kjo është në radhë të parë puna, vepra dhe merita e familjes së madhe të sicialistëve dhe progresistëve shqiptarë. Historia e PS është historia e një transformimi të brendshëm, në funksion të një vendi që duhej transformuar. PS u bë zëdhënësja e nevojave të vendit dhe njëkohësisht edhe fuqia që i adresoi ato nevoja. Sot është e paimagjinueshme që të flitet për një vend në kërkim të stabilitetit të arsyeshëm. Kur Shqipëria pati nevojë për stabilitet, ishte PS ajo që e mundësoi këtë stabilitet. Nëse sot Shqipëria është më pranë se kurrë BE-së, ka vetëm një arsye të madhe, që është forca, përkushtimi dhe puna e PS-së”, vijoi më tej Rama.
Rama tha se Partia Socialiste vetëm për një numër të vogël votash nuk mundi të siguronte mandatin e nëntë në këtë qark.
“Në zgjedhjet që lamë pas morëm rezultatin më të mirë historik të PS-së. Për një numër shumë të vogël votash nuk e morëm dot mandatin e nëntë, por garantuam një distancë shumë të madhe nga kundërshtarët,” u shpreh Rama.
Ai tha se ata që nuk janë pjesë e organizimit dhe fushatave elektorale mund të kërkojnë justifikime për humbjet, por sipas tij, rezultatet e socialistëve janë fryt i një pune të gjatë dhe të organizuar.
“Kush nuk është i përfshirë në këtë familje të madhe dhe rrugëtimin tonë, kush nuk ka idenë se çfarë do të thotë të jesh pjesë e organizimeve dhe fushatave, mund të gjejë lloj-lloj justifikimesh pse humb. Por kush është pjesë e këtij rrugëtimi dhe e rezultateve tona, e di shumë mirë se ato burojnë nga një punë, organizim, përkushtim dhe një besim i jashtëzakonshëm tek vetja,” deklaroi kryeministri.
Ditën e sotme, Partia Socialiste e Durrësit feston 35 vjetorin e themelimit të saj. Përmes një ceremonie të zhvilluar në qytetin bregdetar, është pasqyruar aktiviteti i kësaj force politike, përgjatë këtyre viteve të demokracisë.
Në aktivitet kanë qenë të pranishëm disa figura të rëndësishme të kësa force politike, përfshi kryeministrin Edi Rama, por edhe mbështetës ndër vite të Partisë Socialiste. Gjatë ceremonisë, janë zhvilluar edhe aktivitete të tjera, të cilat kanë sjellë një atmosferë festive mes të pranishmëve. Drejtuesit e Partisë Socialiste kishin rezervuar certifikata mirënjohjeje për 9 prej themeluesve të PS dega Durrës, për të vlerësuar kontributin e dhënë prej tyre për këtë forcë politike.
Lini një Përgjigje