FLASH
Shkruar nga Pamfleti
Festivali i 70-të i Eurovision Song Contest 2026 do të zhvillohet në Vjenë, në maj të vitit 2026, pas fitores së Austrisë në edicionin e kaluar. Edhe pse ende nuk ka nisur, eventi është shoqëruar tashmë nga tensione politike dhe diskutime mbi pjesëmarrjen e disa vendeve.
Austria siguroi të drejtën e organizimit pasi këngëtari JJ fitoi konkursin e vitit 2025 me këngën “Wasted Love”. Si vend fitues, Austria kualifikohet automatikisht në finalen e madhe, së bashku me të ashtuquajturat “Pesë të Mëdhenjtë”: Britania e Madhe, Franca, Gjermania, Italia dhe Spanja.
Konkursi, i organizuar nga Unioni Evropian i Transmetimeve, mbetet një nga eventet më të ndjekura muzikore në botë, ku këngët duhet të jenë origjinale, të mos kalojnë tre minuta dhe të interpretohen live në skenë, pa përdorim playback.
Pjesëmarrja për vitin 2026 pritet të përfshijë rreth 35 shtete, megjithatë disa vende si Islanda, Irlanda, Holanda, Sllovenia dhe Spanja kanë bërë të ditur se mund të mos marrin pjesë, në shenjë proteste ndaj disa zhvillimeve të lidhura me konkursin.
Ndërkohë, Greqia do të përfaqësohet nga artisti Akylas me këngën “Ferto”, një projekt që kombinon elemente pop dhe elektronike dhe që ka siguruar vendin në bazë të një përzgjedhjeje kombëtare të zhvilluar në Athinë.
Edhe Shqipëria do të jetë pjesë e garës me këngën “Nân”, të interpretuar nga Alis. Kënga, e kënduar në shqip, është vlerësuar për stilin e saj emocional dhe identitetin e fortë, duke u konsideruar si një pretendente për kualifikim në finale, në varësi të performancës live në skenë.
Finalja e madhe e Eurovision Song Contest 2026 pritet të zhvillohet në maj, ndërsa rrugëtimi drejt saj do të nisë me gjysmëfinalet, ku pjesëmarrësit do të luftojnë për një vend në skenën finale.
Lini një Përgjigje