FLASH
Shkruar nga Pamfleti
Durim Bami ka mbërritur mbrëmjen e sotme në Shqipëri, pas ekstradimit nga Dubai, ku ishte arrestuar në tetor të vitit 2024.
Ndërkohë janë publikuar pamjet e shoqërimit të tij nga Aeroporti i Rinasit drejt IEVP nën masa të forta sigurie nga Forcat Operacionale të Drejtorisë së Përgjithshme të Burgjeve.
Bami ishte shpallur në kërkim ndërkombëtar me vendim të Gjykatës së Posaçme, e cila i kishte caktuar masën e sigurisë “Arrest në burg”. Ai akuzohet për veprat penale: “Sigurimi i kushteve dhe i mjeteve materiale për të kryer vrasje”, “Grupi i strukturuar kriminal”, “Kultivimi i bimëve narkotike” dhe “Kryerja e veprave penale nga organizata kriminale ose grup i strukturuar kriminal”.
Sipas autoriteteve, ai konsiderohet një nga anëtarët e ashtuquajturës “banda e Niklës”.
Sipas dosjes hetimore të Prokurorisë së Posaçme (SPAK), Bami akuzohet se kishte kërkuar eliminimin e ish-deputetit socialist Arben Ndoka. Po sipas hetimeve, edhe vetë Bami ishte objektiv i planeve për atentat nga grupe të tjera kriminale. Në këtë kontekst, është përmendur edhe emri i Ervis Martinajt, i cili dyshohet se kishte ofruar 1 milion euro për eliminimin e tij.
Në shkurt të vitit 2021, Bami dyshohet se, në bashkëpunim me Endrit Doklen dhe Marklen Hakën, kishte planifikuar vrasjen e Tori Xhecukës dhe Erigers Mihasit, ky i fundit mik i Ervis Martinajt, i cili u vra në Tiranë.
Sipas SPAK, gjatë periudhës dhjetor 2019 – korrik 2020 dhe sërish në shtator 2020, Bami dyshohet se drejtonte dhe financonte një grup të strukturuar kriminal që kultivonte kanabis në zonat e Niklës dhe Bubqit. Ai akuzohet se administronte të gjithë aktivitetin kriminal, nga organizimi deri te sigurimi i kushteve për shmangien e kontrolleve.
Në ndihmë të tij, sipas hetimeve, ishte edhe ish-efektivi i RENEA-s, Altin Morina, tashmë i arrestuar, si dhe persona të tjerë ende të paidentifikuar, të cilët dyshohet se siguronin informacione të brendshme dhe ndihmonin në shmangien e ndërhyrjeve policore.
Lini një Përgjigje