FLASH
Shkruar nga Pamfleti
10 personat e arrestuar gjatë operacionit anti-drogë që zbuloi në Shqipëri një laborator të ekstraktimit të kokainës dhe dy baza të tjera u pyetën gjatë javës nga Prokuroria e Posaçme.
Në pyetje u morën edhe 3 shtetasit e huaj; 2 nga Venezuela dhe 1 nga Kolumbia, që dyshohet se kishin roli e kimistëve në grup.
Hetuesit që pretendojne se kanë arritur të dokumentojnë përfshirjen e tyre në këtë aktivitet, nga përgjimet ambientale dhe vëzhgimet në terren, i vunë ata përballë rezultateve të hetimit.
Gjithashtu po krahasojnë përgjigjet e dhëna prej tyre për lëvizjet dhe kontaktet që kanë mbajtur me të dhënat e deritanishme.
Nga ana tjetër, SPAK është në pritje të rezultatit të ekspertimeve që po u bëhen në laboratorin e Prokurorisë telefonave dhe pajisjeve të tjera elektronike, si laptopët e sekuestruar.
Në 15 Nëntor, SPAK drejtoi një operacion ku në pranga përfunduan 10 persona, që sipas njoftimit, kishin financuar dhe më pas realizuar trafikun e kokainës nga Amerika Latine në dy raste, Shtator dhe Nëntor të këtij viti.
Lënda ishte e kamufluar në lëkurët e gjedhit, kjo e konfirmuar tashmë edhe nga ekspertiza e kryer nga SPAK, dhe do ndahej prej saj nga kimistët në laboratorin në Qerekë të Fushë-Krujës.
10 të akuzuarit për laboratorin e kokainës u arrestuan gjatë një operacioni të zhvilluar nga SPAK e agjentët spanjollë më 15 dhe 16 Nëntor.
Gjatë dëshmisë para togave të zeza, shtetasi nga Venezuela u shpreh se “Kam ardhur në Shqipëri për të mbjellë flokët”.
Ndërsa i huaji tjetër është shprehur se kishte ardhur për të blerë rroba të përdorura, pasi pretendon se është tregtar.
Shqiptarët e arrestuar janë:
1- Geis Sejfullai 42 vjeç, banues në Tiranë
2- Klajdi Birçe 40 vjeç, banues në Tiranë
3- Artion Çaushllari, 37 vjeç, banues në Tiranë
4- Endi Sejdini, 25 vjeç, banues në Krujë
5- Aldi Zonja 37 vjeç, banues në Tiranë
6- Ismail Abdurrahmani, 51 vjeç, banues në Shkodër
7 – Baki Huqi, 57 vjeç, banues në Durrës
Të huajt e arrestuar;
1- Hiwlen Ledezma Narvaez, 41 vjeç, shtetas kolumbian
2- Joze Ramon Zacarias Vasquez, 35 vjeç, shtetas venezuelian
3- Samuel Alfonso Moreno Serrano, 42 vjeç, shtetas venezuelian
Personazhet e vënë në pranga, në fakt, janë emra të panjohur për sistemin tonë të drejtësisë, përjashtim bën njëri prej tyre i dënuam për dy vrasje në dy kohë të ndryshme. Por ata që konsiderohen si organizator dhe financues të grupit në fakt nuk rezultojnë të skeduar më parë në vendin tonë. Prokuroria e Posaçme bëri me dije se ka qenë në dijeni të dy ngarkesave që do të vinin në emër të këtij grupi, çka do të thotë se njëri nga këta protagonistë ka qenë në përgjim.
Lini një Përgjigje