FLASH
Shkruar nga Pamfleti
Në operacionin e koordinuar me Europol, Holandën dhe SHBA, autoritetet raportojnë goditje me vlerë 346 milionë dollarë në tregun europian
Policia Kombëtare e Ekuadorit ka çmontuar një strukture kriminale të lidhur me mafien shqiptare, e cila operonte në provincat Guayas, Pichincha dhe El Oro. Operacioni përfundoi me 16 persona të arrestuar, 26 kontrolle banesash dhe sekuestrimin e 7,64 tonëve lëndë narkotike, që sipas autoriteteve arrijnë një vlerë të përllogaritur prej 346 milionë dollarësh në tregun europian, shkruan "El Diario".
Të ndaluarit u transferuan në njësinë aeropoliciale të Zonës 8, ndërsa hetimet u zhvilluan në bashkëpunim me agjenci europiane dhe amerikane.
Sipas Policisë, hetimi nisi në tetor 2024, pas një operacioni në sektorin Barbones, në provincën El Oro, ku u sekuestrua gjysmë ton drogë dhe u arrestuan tre persona. Nga ajo fazë, autoritetet ekuadoriane koordinuan veprimet me Europol, si dhe me autoritetet e Holandës, Belgjikës dhe Administratën Amerikane Kundër Drogës (DEA).
Ministri i Brendshëm i Ekuadorit, John Reimberg, deklaroi se organizata përdorte porte ekuadoriane për të “kontaminuar” ngarkesa me destinacion Europën.
“U realizuan 26 kontrolle në provinca të ndryshme të territorit ekuadorian, duke çuar në arrestimin e 16 personave”, tha ai.
Operacione paralele në Europë
Autoritetet njoftuan se hetimet zbuluan lidhje të drejtpërdrejta me shtetas shqiptarë, të konsideruar objektiva prioritare edhe në procese të zhvilluara paralelisht në Spanjë.
Në Holandë u zhvilluan operacione të njëkohshme, ku në kuadër të operacionit “Victoria” u sekuestruan 2,5 ton drogë dhe u arrestuan pesë persona me shtetësi holandeze dhe rumune. Në operacionin “Victoria II” u sekuestruan edhe 1,2 ton të tjera, pa raportime për arrestime.
Në një operacion tjetër në territorin europian u sekuestruan 3,2 ton dhe u arrestuan tre shtetas shqiptarë. Sipas autoriteteve, totali i drogës së sekuestruar në Europë dhe Ekuador arrin në 7,64 ton.
Ministri Reimberg theksoi se ndikimi ekonomik ndaj organizatës kriminale “kalon 346 milionë dollarë”.
Pasuri të sekuestruara dhe persona të përfshirë
Gjatë kontrolleve në Ekuador, Policia raportoi sekuestrimin e 14 automjeteve luksoze, 20 telefonave celularë, armë zjarri, bizhuteri dhe mbi 800 mijë dollarë para në dorë të gjetura në banesa të lidhura me rrjetin.
Mes të arrestuarve përmendet Hernán Ruilova, i kapur në Machala, i cili sipas ministrit ishte pjesë e strukturës që merrej me përzierjen e drogës në ngarkesa të destinuara për Europën. Po ashtu u arrestua ish-deputeti Salomón Padua, i cili, sipas autoriteteve, hetohet për përfshirje në krim të organizuar dhe trafik droge.
Autoritetet nuk kanë bërë publike detaje të mëtejshme mbi rolin konkret të secilit të ndaluar, ndërsa hetimet vijojnë.
Qeveria paralajmëron operacione të reja
Ministri i Brendshëm konfirmoi se në Ekuador ishte ngritur një qendër operative me pjesëmarrjen e agjentëve të Europol-it, Policisë së Antverpit, njësisë kombëtare të hetimeve të Holandës dhe DEA-s, për të monitoruar ndërhyrjen.
Ai njoftoi gjithashtu se midis 15 dhe 30 marsit pritet të zhvillohen operacione të tjera në katër provinca, në kuadër të gjendjes së jashtëzakonshme dhe shtetrrethimit të shpallur nga presidenti i vendit.
Sipas ministrit, bashkëpunimi me Shtetet e Bashkuara përfshin shkëmbim informacioni, sekuestrim armësh dhe veprime kundër dërgesave të paligjshme. Ai shtoi se në muajin shkurt është regjistruar një ulje prej rreth 10% e vrasjeve të dhunshme, në kuadër të strategjisë kundër strukturave kriminale.
Lini një Përgjigje